Foron entrando por quendas, acompañados polos seus mestres, e foron recibindo as explicacións da profesora de Relixión Trini Carballo
O alumnado do CEIP Manuel Cordo Boullosa de Ponte Caldelas visitaron esta mañá o Belén Artesanal de estilo hebraico, deseñado por Antonio Varela e Marisol Peso e que está instalado na Casa Rectoral do Sagrado Corazón de Ponte Caldelas.
Visitaron este Belén xigante a través dunha invitación cursada polo presidente da Asociación Cultural O Torreiro de Forzáns, Antón Xil, entidade promotora desta iniciativa que conta coa colaboración da Unidade Pastoral de Ponte Caldelas cuxo cura párroco é Benito Vázquez.
Pese ao mal tempo, os escolares chegaron por quendas en microbús desde o centro educativo e foron entrando ao edificio que alberga o Belén para que a profesora de Relixión Trini Carballo poidera darlles unha explicación sobre as distintas escenas representadas na composición belenista.
Os cativos sorprendéronse polo realismo das pezas alí expostas e construídas por Antonio Varela e Marisol Peso e centraron gran parte das súas preguntas sobre o Pazo de Herodes, unha réplica dunha vivenda suntuosa de daba cobixo ás máximas autoridades do momento.
UN BELÉN ARTESANAL AUSTERO, DOCUMENTADO NO PERIODO HISTÓRICO NO QUE NACEU XESUCRISTO
O Belén artesanal de estilo hebraico imita unha aldea xudea con elementos arquitectónicos do momento, resultado dun proceso de documentación previo realizado por Antonio Varela e Marisol Peso e que se ergue sobre un escenario árido de deserto e montañoso que coincide coa fisonomía física de Xudea.
As edificacións presentes no Belén están feitas a man con total realismo e sobresaen os destalles levados a cabo con sumo coidado e cun nivel de precisión extraordinario. Tamén é de salientar a decoración vexetal, os sendeiros e camiños e toda a composición que acada unha beleza extraordinaria.
Ademais de que este Belén poida ser visitado polo público, a Asociación Cultural O Torreiro de Forzáns cursou invitacións aos centros educativos e as escolas infantís do municipio así como aos de Fornelos de Montes e A Lama para que poidan achegarse ata Ponte Caldelas e gozar desta demostración da arte belenista.
