A proposta nacionalista para avanzar cara á remunicipalización foi tombada no Pleno por socialistas e populares a pesar das “graves deficiencias” do servizo en mans privadas
Xabier P. Igrexas: “Perdemos unha grande oportunidade para dotar a maior cidade galega dun servizo de bus urbano á altura do século XXI con pleno control do Concello”
O Bloque Nacionalista Galego (BNG) afea a ‘pinza’ de PSOE e PP para perpetuar a privatización do autobús urbano en Vigo. Durante o debate no Pleno municipal decorrido este luns, a proposta da fronte nacionalista para a remunicipalización do servizo coa creación dunha Empresa Municipal de Transportes, no marco da fin da concesión actual, foi tombada polos votos socialistas e populares.
O portavoz municipal do BNG, Xabier P. Igrexas, lamentou a “grande oportunidade perdida” para dotar dun servizo público de bus urbano á cidade en lugar dun “gran negocio para uns poucos”, en referencia ás graves deficiencias e insuficiencias da xestión en mans de Vitrasa, imposta no ano 1994 polo voto de calidade do daquela alcalde socialista Carlos Príncipe.
Dende o Bloque rexeitaron a fórmula escollida polo Goberno de Abel Caballero para manter a privatización do bus urbano a través dun “contrato de servizos” que, advertiron, traslada ao Concello todos os riscos económicos e financeiros. “O seu modelo de xestión é tan público como o Hospital Álvaro Cunqueiro, nada”, ironizou Igrexas.
Para a fronte nacionalista a nova prórroga de dous anos outorgada polo Goberno local, diante da fin da concesión de Vitrasa, debía ser aproveitada para avanzar na constitución dunha Empresa Municipal de Transporte que permitise xestionar de forma directa un servizo esencial como o bus urbano, na liña doutras cidades europeas e do Estado, algunhas de menor tamaño e tamén baixo gobernos socialistas.
Igrexas defendeu a remunicipalización como a única alternativa para que o Concello teña pleno control sobre o servizo e unha maior capacidade organizativa para adaptalo ás necesidades de veciñanza e “non aos intereses lucrativos dunha empresa privada”. Unha medida que, asegurou, é perfectamente factíbel a nivel económico e legal, prevista na Lei de Bases de Réxime Local e na Lei de Contratos do Sector Público.
Deficiencias do modelo privatizado
O portavoz municipal do BNG advertiu de que a decisión de optar por un “contrato de servizos” insiste nun modelo privatizado que se demostrou prexudicial para o transporte público. Denunciou neste sentido a supresión por parte de Vitrasa de 250 frecuencias diarias desde 2019, a continuidade dun mapa de liñas “obsoleto”, unha importante precariedade laboral que motivou mobilizacións nos últimos anos e co prezo do billete (tamén bonificado) máis caro das cidades galegas e dos máis elevados do Estado.
“Hoxe non hai máis demanda porque existe unha oferta insuficiente”, criticou Igrexas, poñendo como exemplo a xestión municipal do Bloque á fronte da área de mobilidade, entre os anos 1999 e 2003, que permitiu incrementar o número de persoas usuarias con medidas como a tarxeta verde, as bonificacións e o billete de transferencia.
A ese respecto, alertou sobre as intencións do Goberno de Caballero de “condenar” ás parroquias rurais a servizos a demanda sen garantir liñas regulares. Unhas sospeitas que, advertiu, se suman ao “escurantismo” co novo modelo de bus urbano e a falla de información sobre o ‘Estudo técnico sobre a demanda do transporte urbano colectivo’ contratado polo Concello en novembro de 2023 por case 320 mil euros.
“Nada sabemos cando pasou medio ano do prazo de entrega finalizou nin temos constancia de que se fixeran ningunha das 4.000 entrevistas previstas”, denunciou o voceiro do Bloque. Sobre a futura licitación do servizo, criticou o “nulo diálogo” do Goberno local co tecido asociativo e veciñal e cuestionou o incremento de case un 90% no custo previsto do servizo, pasando dos 24 millóns actuais a 45 millóns de euros.
