Este venres 26 de Abril ás 20:00 o BNG participará nunha reunión informativa sobre a macrocelulosa que se pretende instalar no concello de Palas de Rei. O acto, no que tamén intervirán o concelleiro Xoan Reices e da deputada do BNG Ariadna Fernández, contará coa participación do profesor de Economía Medioambiental Bernardo Valdés e a experta en ecoloxía de augas de ADEGA, Ana Santamariña.
“O novo alcalde ten a oportunidade de reconducir a posición que mantivo até o de agora o anterior goberno municipal”, sostén Reices. “Desde o BNG confiamos en que se amose unha maior sensibilidade sobre este tema e que o novo titular da concellería de Medio Ambiente se sume ás reivindicacións da veciñanza e do BNG contra a macrocelulosa de Altri”, engade o voceiro nacionalista.
“Este proxecto ten consecuencias directas na veciñanza da Estrada, xa que pode prexudicar gravemente o río Ulla coas implicacións ecolóxicas, sociais e económicas que iso tería no noso concello“ explica Xoán Reices, voceiro da formación nacionalista. Dende o BNG apuntan á afección que a nova celulosa pode ter nas xa reducidas poboacións de peixes, o que podería por en perigo a festa do escalo ou a propia festa do salmón. Ademais disto pode afectar a diferentes zonas de baño ao longo do río, un importante atractivo turístico do noso concello.
Consideran os nacionalistas que este tipo de proxectos industriais non se poden implantar de costas á veciñanza polo que é necesario que a veciñanza estea correctamente informada sobre este proxecto e que os diferentes grupos políticos teñan unha posición unitaria contra esta nova celulosa.
Por iso, desde o Bloque Nacionalista Galego convidan publicamente ao novo alcalde Gonzalo Louzao ao igual que a toda a veciñanza a acudir ao acto informativo do venres e coñecer as implicacións que este proxecto vai ter no noso concello.
