O grupo municipal solicita que se cubra a praza de administrativo presente nos orzamentos
O BNG de Meaño solicitará á Alcaldía, na vindeira sesión plenaria ordinaria a celebrarse este xoves día 24 de setembro, que analice de xeito periódico o estado de salubridade das fontes do municipio, a fin de determinar a potabilidade da auga para uso dos veciños e veciñas. Tamén proporán que se teña como prioridade a existencia de vexetación nos espazos públicos, xa que hai moitas prazas do concello que non teñen sombra para poder desfrutalas os días de sol.
Denuncian a demora na convocatoria das subvencións en materia de cultura das que se nutren as diferentes asociacións culturais do concello. É imprescindible que a Alcaldía cubra inmediatamente a praza de administrativ@ que está pendente dende hai case un ano, pois a alta carga de traballo á que está sometido o persoal administrativo actual dificulta a xestión diaria do concello.
O BNG de Meaño critica a decisión da Alcaldía pola que o presente curso escolar a Escola Infantil Municipal ve reducido o seu horario en dúas horas na quenda da tarde. O grupo da oposición solicitou a relación de alumnado matriculado segundo a franxa horaria demandada mais non tivo resposta por parte do Goberno Municipal.
Logo de coñecer o estudo encargado polo Goberno do PP da Xunta de Galiza para incentivar procesos de agrupación municipal -onde se propón a fusión dos concellos de Meaño e Sanxenxo- o BNG de Meaño oponse a dita unión, pois considera que non suporía ningunha mellora para a vida dos meañeses e meañesas.
