O BNG DE Meis cumprindo co seu programa electoral apoiou a remunicipalización do albergue de peregrinos San Ero da Armenteira ante as numerosas irregularidades da etapa anterior.
Fíxose unha nova concesión e agora vemos como a licenza concedida á nova concesionaria non está sendo cumprida polos xestores actuais, o cal supón un prexuízo intolerable para o sector servizos da parroquia.
Revisamos a licenza concedida e vemos que está sendo incumprida nos seguintes puntos:
1/ O albergue está a servir carta de comidas, con selo do albergue e tarifa de prezos cando non ten licenza para facelo, ocasionando un prexuízo enorme aos hostaleiros do concello, nomeadamente da parroquia, que están a pagar uns impostos para ver como dun xeito furtivo outros fan un servizo de comidas que non se axusta á legalidade.
2/ O albergue está a ser utilizado por un taxi alleo ao concello, sobrelimitándose nas súas funcións, e chegando ao extremo de ser o único taxi publicitado no establecemento, desaparecendo os números de teléfono dos taxis do concello, dos cales non hai nin rastro a pesar de por os números o sector de Meis como ben puido comprobar o BNG.
Ante está situación que se dilata no tempo, o grupo municipal do BNG de Meis quere pór en coñecemento que a partir de hoxe, e unha vez posto en coñecemento da alcaldía, tomará todas as medidas necesarias até lograr o restablecemento da legalidade vixente e sempre en defensa dos sectores de Meis.
