O BNG de Meis volveu preguntar, por terceira vez, sobre o expediente aberto á concesionaria do albergue de peregrinos da Armenteira. Xa levamos máis de 5 meses dende o inicio do expediente e debido á gravidade dos feitos denunciados é necesario dar a coñecer a resolución adoptada para poder trasladala á cidadanía e que non se instale a sensación, que xa está a suceder, de trato de favor á concesionaria do albergue por parte da alcaldía.
Levamos dende o día 25 de abril de 2022 que o BNG de Meis pon en coñecemento da alcaldía gravísimos incumprimentos por parte da concesionaria. No pleno do 27 de maio sae adiante unha moción do BNG para a resolución do contrato, pero a alcaldía decide non cumprir o mandato democrático do pleno alegando que o día 10 de maio se iniciou un expediente sancionador e están a espera da resolución do expediente para proceder á sanción que teña lugar.
Pasados máis de 5 meses dende o inicio do expediente sancionador, lembremos que por feitos moi graves tal e como constan no propio expediente sancionador, aínda non sabemos nada da resolución de dito expediente, a pesar de facer o BNG unha pregunta no pleno de Xullo e presentar un rogo fai máis dun mes, o cal xera unha sensación de incredulidade e favoritismo que fai moito dano á imaxe do noso concello.