Despois de moitas preguntas por parte da veciñanza de que sucederá coas actividades deportivas do concello, ante a remodelación do pavillón municipal que durará meses, o BNG quere resaltar que as actividades deportivas para persoas maiores non poden parar porque beneficiaban a estas persoas en tres aspectos que consideramos primordiais; unha mellora do seu estado físico e mental, a posibilidade de realizar estas actividades sen ter que desprazarse, dado que moitas/os usuarias/os non teñen medios para facelo e a uns prezos alcanzábeis para persoas con diferentes recursos.
En definitiva, o servizo prestaba unha serie de beneficios socias e comunitarios, como manter a actividade física das persoas adultas, mellorando a súa saúde física e mobilidade e tamén o seu benestar mental.
Polo tanto o BNG de Meis considera que, inda que consideramos o servizo necesario para todas as franxas de idade, parécenos imprescindíbel no caso dos nosos maiores, nomeadamente a xerontoximnasia e a actividade de pilates.
Pedimos así, que se manteñan as actividades que se ofertaban para esta franxa de idade, buscando locais alternativos, en locais de propiedade municipal ou locais pertencentes a asociacións ou comunidades, chegando a acordos con estas entidades no caso de ser preciso.
Tamén solicitamos que ademais na zona do Mosteiro se amplíen as actividades a outras parroquias do concello para ofertar un mellor servizo á comunidade ou se posibilite o transporte por medios públicos, xa que hai persoas que non posúen medios para desprazarse e tamén se verían beneficiadas deste servizo.