O BNG de Ogrobe presenta unha moción para o próximo pleno na que solicita se tomen medidas para a accesibilidade e mobilidade das persoas.
O voceiro Anselmo Noia, denuncia un problema que se alonga no tempo e ó que non se lle presta a debida atención: a situación de postes no medio e medio das beirarrúas que obrigan a baixarse delas ás persoas así como impiden o paso de carriños de bebé ou cadeiras de rodas.
Asemade, moitos destes postes de madeira semellan un deterioro grave, que pode poñer en perigo ás persoas.
E xa para rematar a estética que nos deixa é a dun pobo atrasado e terceiromundista, moi lonxe da imaxen limpa e moderna que lle corresponde a un pobo de exquisitez turística
Este problema salpica a todo o término municipal e perdura no tempo, a veces desde a propia creación da rúa.
O caso da Avda. Portugal pero tamén da Estrada do Conde ou na Rúa do Vento son exemplos claros da deixadez das compañías subministradoras e da deixadez de funcións do goberno do sr. Cacabelos, non exixindo os arranxos oportunos nos momentos adecuados.
Na moción o BNG local insta ó goberno municipal a que se tomen cartas no asunto, exixan ás empresas de telecomunicacións a retirada e/ou supresión dos postes, que se realizen inspeccións de seguridade de todos eles e que se elaboren e executen proxectos específicos tendentes á eliminación do cableado aéreo, máis aínda nos proxectos que se executen de novo, cousa que non se está a facer.
En arquivo adxunto fotos de dúas rúas que pola súa perigosidade e gravidade motivan esta moción.
