Marga Caldas explica que os informes municipais desvelan a necesidade dun proxecto modificado para garantir a durabilidade e seguridade do equipamento
O BNG de Poio vén de alertar dos retrasos que está a sufrir a execución das obras do parque polideportivo de Vilariño debido á falta de previsión e planificación na detección de problemas técnicos durante a fase inicial dos traballos. O grupo municipal nacionalista advirte de que a actuación aínda se demorará no tempo pola necesidade dun proxecto modificado que corrixa os contratempos que xurdiron.
A voceira Marga Caldas destaca que, a pesares de que o goberno local negou en reiteradas ocasións a existencia de problemas, os propios informes municipais recentes desvelan que, unha vez iniciadas as obras, detectouse a presenza de rocha nos lindes duns galpóns próximos, o que complicou as operacións de escavación e picado mecánico, alertando de posibles danos estruturais. Isto obriga a reconsiderar e revisar a solución proxectada orixinalmente.
Ademais, engade Caldas, identificouse tamén o afloramento dunha cantidade “significativa” de auga subterránea na zona, polo que será necesario deseñar solucións específicas de drenaxe e estabilización para garantir a durabilidade e seguridade do equipamento.
Ante esta situación, o BNG esixiu no último Pleno ao goberno local maior transparencia e responsabilidades ante o que cualifica como unha mostra clara de ocultismo e falta de planificación adecuada. A formación nacionalista insta á redacción urxente do proxecto modificado necesario para que se adapte ás novas circunstancias, advertindo que os feitos demostran que a execución das obras do parque se demorarán aínda varios meses máis.
Caldas lembra que o Concello de Poio anunciou a “bombo e platillo” en setembro que a pista polideportiva sería unha realidade antes de rematar o ano. A obra estaba programada para comezar en outubro, cun prazo máximo de tres meses.
Para o BNG a maneira de actuar do Partido Popular, con Moldes á cabeza, evidencia unha vez máis a necesidade de mellorar a xestión e planificación dos proxectos para garantir a súa correcta execución e o cumprimento dos prazos anunciados. “Cando hai que actuar nunha zona, o mínimo é estudar o terreo previamente para despois non atopar sorpresas. Saír coma un campión anunciando a actuación e despois ter que agochar a nefasta xestión é algo ao que Moldes, desgrazadamente, xa nos ten acostumadas”, lamenta Caldas.
