Os nacionalistas esixen ao alcalde unha copia do convenio que facilita a utilización de parte da praza Manuel Cortés e da Casa de Cultura de Bordóns por parte dunha iniciativa de carácter privado
O Bloque faise eco do gran malestar que existe na parroquia, toda vez que Telmo Martín non informou á veciñanza destes feitos, e lamenta que o PP priorice os intereses privados por riba dos da cidadanía
O grupo municipal do Bloque Nacionalista Galego (BNG) de Sanxenxo esixiu no Pleno ordinario deste luns unha copia do suposto convenio a través do cal o Concello está a permitir a ocupación de parte da Praza Manuel Cortés de Bordóns, así como da Casa de Cultura desta parroquia, por parte dun negocio privado para a súa explotación.
Os nacionalistas requiriron esta documentación logo de que Telmo Martín asegurase que existe un acordo para que se leve a cabo esta actividade nunhas instalacións de carácter público, e cuxa ocupación está a provocar un gran malestar en Bordóns. Tal e como lembrou o voceiro do Bloque, Fran Leiro, “nin o señor alcalde nin o Goberno local do Partido Popular informaron desta situación á veciñanza, que observa con abraio como o Concello permite o uso da praza de da Casa de Cultura por parte dunha empresa particular co único obxectivo de facer cartos”. Desde hai uns días, parte da praza está ocupada cunha terraza ‘chill out’, mentres que o interior das dependencias contan con mobiliario instalado polo responsable deste negocio. Ante estes feitos, o BNG esixiu ao alcalde que aclare “quen lle deu as chaves a este particular” e amosou a súa preocupación polo feito de que o alcalde recoñecese, a preguntas dos propios nacionalistas, que non percibe ningún problema por estes feitos, a pesar de que o propio Telmo Martín si recoñeceu na súa resposta de que o responsable do negocio ‘pasouse de freada’. “Parécenos moi grave que o Concello non poña ningún impedimento para que un negocio de carácter privado utilice unhas dependencias públicas para facer cartos e enriquecerse, máxime cando é unha actividade da que ningún colectivo local obtén beneficio algún”, denunciou Fran Leiro, que tamén se mostrou moi crítico pola aprobación por parte do Goberno local desta actuación sen que houbese ningún tipo de información previa. “Os espazos públicos son para o uso da veciñanza, non é de recibo que se fagan este tipo de concesións a entidas privadas e moito menos a costas da poboación”, critican desde o Bloque.
O PP, en contra do reforzo de persoal sanitario nos centros de saúde de Sanxenxo
Durante o Pleno ordinario, o BNG presentou varias mocións que, como sucede a cotío, foron rexeitadas polo Partido Popular. O Goberno de Telmo Martín nin sequera foi quen de apoiar unha proposta feita polos nacionalistas, a través da cal pedían instar á Consellería de Sanidade a que reforzase o persoal sanitario nos centros de saúde de Baltar e Vilalonga. O Bloque advirte de que non se están a cubrir as vacacións dos e das profesionais, o que provoca unha saturación que se ve agravada polo incremento de poboación que experimenta Sanxenxo nestas datas.
A moción tamén incluía unha solicitude para que a Xunta de Galicia dotase ao Centro de Saúde de Baltar dunha ambulancia medicalizada propia durante o verán, sen que isto supuxese privar a Vilagarcía deste servizo, tal e como está a suceder na actualidade. Fran Leiro recordou durante a exposición da moción que “co aumento exponencial de poboación que se da no noso concello nestes meses, o lóxico sería que Sanxenxo contase cunha ambulancia medicalizada propia, sen que iso supoña un prexuízo para Vilagarcía. O normal é aumentar a cobertura onde aumenta tamén o número de persoas. Non é xusto que para que Sanxenxo conte con este servizo haxa que retiralo doutra zona. Iso é desvestir a un santo para vestir a outro e supón poñer en risco á veciñanza e a todos os visitantes”, advertiu o voceiro nacionalista.
Por último, o Bloque tamén lamentou o voto en contra por parte do PP da proposta para cambiar o nome do Porto Deportivo, de xeito que deixase de estar asociado á figura do rei emérito, que cada vez provoca máis rexeitamento por parte da sociedade por todas as información que veñen saíndo á luz pública sobre actuacións e comportantos do antigo xefe de Estado. “O Partido Popular e Telmo Martín perderon unha oportunidade histórica para facer limpeza democrática”, conclúe o BNG.
