Afea a negativa do PSOE a mobilizar 14 millóns de euros máis para abordar o grave problema do acceso social á vivenda
A fronte nacionalista denuncia o veto a todas as súas propostas para mellorar a atención dos barrios e parroquias, reforzar as políticas feministas, acabar co devalar cultural e o abandono do deporte, protexer o noso patrimonio e promover a lingua galega
Xabier P. Igrexas: “Caballero insiste nun permanente día da marmota do desgoberno do vuelva usted mañana, de prometer e non facer”
O Bloque Nacionalista Galego (BNG) cualificou hoxe como “estafa política” as modificacións orzamentarias presentadas polo Goberno municipal de Abel Caballero no Pleno extraordinario do Concello de Vigo, celebrado esta mañá, e aprobadas só co “rodete absolutista” do PSOE.
O portavoz municipal do BNG, Xabier P. Igrexas, denunciou que “os remanentes non son aforro”, senón o resultado da “falla de xestión” do Concello, e propuxo un voto particular para suprimir partidas arbitrarias como os 215 mil euros para desaloxar a Federación de Asociacións Veciñais (FAVEC) ou os 635 mil euros en subvencións á Igrexa católica, dedicando 37 millóns adicionais a prioridades como vivenda, barrios e servizos sociais.
Estafa política
Igrexas criticou que as modificacións orzamentarias chegan con atraso e sen intención real de executalas. “Hoxe é 11 de agosto e someten a consideración deste Pleno dúas modificacións que non entrarán en vigor até o 23 de setembro, cando resten apenas 3 meses e 1 semana de exercicio”, denunciou.
O portavoz municipal nacionalista refutou o “relato falso” do Goberno negando que os remanentes sexan “aforro”. “Os remanentes son o peto no que acaba o diñeiro das viguesas e vigueses que vostedes, na súa evidente incapacidade para gobernar, non lle devolven en forma de investimentos nin de mellores servizos”. Igrexas cualificou o Pleno de “permanente día da marmota do desgoberno do ‘vuelva usted mañana’, o da bicicleta financeira que tenta pedalear con demagoxía o señor Aneiros pero que en realidade non anda a pesar de facer máis contorsionismos que Caballero no Marisquiño”. “O seu é anunciar pero non facer, nunha inexecución ao cadrado”, remachou.
O BNG rexeitou varias das partidas incorporadas na proposta do executivo de Caballero por incorreren, afirmaron, nun uso autoritario dos recursos públicos, como os 215 mil euros para reacondicionar a sede da Federación Veciñal e desaloxala como castigo polas súas posicións críticas co executivo de Caballero. “Os recursos públicos do Concello non poden servir para desaloxar de maneira autoritaria ao movemento veciñal da sede da que dispuña desde hai 30 anos como represalia polas posicións reivindicativas e críticas da FAVEC”, afirmou Igrexas.
Tamén criticou os 635 mil euros para a Igrexa católica, que xa recibiu máis de 1 millón nos últimos cinco anos, e os 200 mil euros para promoción turística masiva, un modelo “insustentábel” que supera o orzamento anual para axudas sociais ou emprego.
Políticas reais para vivenda
O BNG celebra a rectificación tardía do goberno de Abel Caballero en materia de vivenda, tras anos de inacción e malia aprobarse hai ano e medio unha moción do Bloque para frear a suba de prezos e facela accesíbel ás clases populares. Porén, critica que as medidas anunciadas poidan quedar en “accións aparenciais” sen impacto real, nun contexto onde o alugueiro medio alcanza os 680 euros (cun aumento do 32,65% en 5 anos e do 7,5% nos últimos doce meses), sen solicitar a declaración de zona tensionada, con 2.400 vivendas turísticas (5 por cada residencial), 6 mil familias rexistrads demandantes de vivenda protexida, só 62 vivendas promovidas pola Xunta desde 2009 e ningunha polo Concello, e 22.000 baleiras.
Por este motivo, o BNG propuxo triplicar o investimento a 21 millóns de euros para reforzar Vigo Aluga, a compra pública de vivenda e a creación da Empresa Municipal de Vivenda, co obxectivo de garantir polo menos que se dispoñibilicen 260 vivendas de alugueiro a prezos accesíbeis fronte as apenas 50 proxectadas polo goberno local. “Vivendas que queren ser os cimentos sobre os que dotar Vigo dun parque público de vivenda social do que curiosamente Abel Caballero nunca fala”, remarcou Igrexas.
Ademais, a fronte nacionalista defende un programa de 1,5 millóns para alternativas habitacionais para persoas en situación de vulnerabilidade, porque “fronte a propaganda do alcalde, a realidade é que en Vigo cada semana prodúcense varios desafiuzamentos sen ningún tipo de alternativa”
Alternativa en positivo para “un novo Vigo”
Nas súas emendas o BNG propuña tamén duplicar as partidas para axudas sociais e destinar 3 millóns de euros ao Plan de Emprego Municipal, impulsar o “Plan Cidade” con 15 millóns para investimentos en infraestruturas e servizos en todos os barrios, e destinar 5 millóns para mellorar as instalacións deportivas, en estado lamentábel. En igualdade, as nacionalistas demandaron 300 mil euros para un Plan integral de abolición da prostitución, anunciado polo goberno pero inexistente. Finalmente, reclamaron 500 mil euros nun Plan de recuperación do patrimonio industrial, arqueolóxico e inmaterial, e 300 mil euros para promover o uso social do galego na cidade.
O Goberno rexeitou todas as emendas do BNG. “Abel Caballero xa dixo ‘non’ 166 veces as propostas do BNG para reforzar a política social e de vivenda, aumentar os investimentos nos barrios e parroquias, despregar unha verdadeira axenda feminista, reverter a desertización cultural e o abandono de deporte”, lamentou Igrexas. Esta “xordeira autoritaria” ignora o tecido asociativo e a oposición, e supón unha actitude “antidemocrática” que esquece que “facer cidade é tarefa de todas e todos”.
Fronte ao “non permanente” do Goberno municipal e a “falla de proxecto e de xestión de quen só ofrece máis do mesmo”, Igrexas comprometeuse a seguir empurrando unha alternativa en positivo, con medidas concretas e factíbeis, para “avanzar na construción dun novo Vigo, entre todas e para todos”. “Un Vigo moito máis verde, máis habitábel e máis igualitario, con máis e mellores servizos públicos e coas persoas no centro das políticas municipais”, proclamou.
