A fronte nacionalista propón a creación dun programa de alternativas habitacionais, un plan de axuda ao alugueiro e o reforzo da Empresa Municipal de Vivenda
En 2025 producíronse case seis desafiuzamentos de media cada semana
Xabier P. Igrexas: “Un Concello que deixa máis de 100 millóns sen executar non pode mirar para outro lado mentres a xente perde a súa casa”
O Bloque Nacionalista Galego (BNG) de Vigo alertou de que o 2025 pechou cunha media de case seis desafiuzamentos cada semana, segundo os datos xudiciais do último trimestre, unha realidade que evidencia a gravidade da emerxencia habitacional que atravesa a cidade.
Na súa meirande parte, trátase de familias e persoas empobrecidas que non poden facer fronte aos prezos do alugueiro, que se incrementaron un 9% no último ano e acumulan unha suba do 35% desde 2020. Unha escalada que fai que, a día de hoxe, mesmo o acceso a unha habitación nun piso compartido supere xa os 300 euros mensuais.
Desde o BNG subliñan que o máis alarmante é que a práctica totalidade destes desafiuzamentos se produciron sen que ningunha administración pública, nin a Xunta nin o Concello, facilitase unha alternativa habitacional accesíbel ás persoas afectadas. “Os desafiuzamentos son a cara máis dramática da emerxencia habitacional que está a expulsar da cidade a familias enteiras e a mocidade que non se pode permitir o luxo de vivir na súa propia cidade”, sinalou o portavoz municipal do BNG, Xabier P. Igrexas.
Igrexas denunciou que “nin a propaganda, os anuncios e as promesas que acaban en papel mollado” poden ocultar a inacción tanto da Xunta do Partido Popular como do Goberno municipal de Abel Caballero. Neste sentido, lembrou que en 2015 o alcalde chegou a afirmar publicamente que “a oficina antidesafiuzamentos é a miña mesa”, mais dez anos despois “segue a ollar para outro lado sen despregar ningunha medida concreta para evitar que máis viguesas e vigueses perdan a súa vivenda”.
Plan de choque
Ante esta situación, o BNG defende que garantir o dereito á vivenda debe ser a principal prioridade política en 2026 para o que reclama que o Concello mobilice, como mínimo, 9,5 millóns de euros -mediante modificacións orzamentarias e o uso dos remanentes municipais- para activar un Plan de Choque fronte ao que xa é o maior problema social da cidade.
En concreto, a fronte nacionalista propón destinar 1,5 millóns de euros á posta en marcha dun programa municipal de alternativas habitacionais que evite que se produza ningún novo desafiuzamento sen solución residencial. Ademais, defenden investir outros 3 millóns nun plan municipal de axuda ao alugueiro, que inclúa achegas directas de até 200 euros mensuais para familias con baixos ingresos e un programa facilitador do alugueiro que permita anticipar fianzas, avais e garantías mediante préstamos sen xuros, especialmente dirixidos a persoas con menos recursos e menores de 35 anos.
Por último, o BNG considera imprescindíbel reforzar con 5 millóns de euros adicionais a Empresa Municipal de Vivenda, aínda pendente da súa constitución legal, para axilizar a creación dun parque público de vivenda social en Vigo.
“As viguesas e vigueses non poden seguir agardando e a inacción da Xunta do PP non pode seguir sendo a escusa para que o Concello non actúe”, concluíu Igrexas, lembrando que “un Concello que vén de deixar sen executar máis de 100 millóns de euros do seu orzamento non pode seguir asubiando mentres a vivenda se converte nun ben de luxo para a maioría social”.
