Alerta da “desertización” do comercio de proximidade mentres se aproban novos macrocentros, como os proxectos de Cruceiro, Recaré e o parque comercial en Valadares
A cidade vai contar cun 150% máis de superficie para grandes áreas cando 1 de cada 4 establecementos do pequeno e mediano comercio pecharon durante a última década
O Bloque Nacionalista Galego (BNG) reclamou este martes que se declare Vigo como “zona saturada” de grandes áreas comerciais e a aprobación dunha moratoria que impida novas aperturas durante os vindeiros 10 anos. O portavoz municipal do BNG, Xabier P. Igrexas, alertou da “desertización” que está sufrindo o comercio de proximidade mentres se suman novos macrocentros na cidade, como os proxectos de Cruceiro, Recaré ou o parque comercial e de lecer no PTL de Valadares.
A fronte nacionalista advertiu de que estas aperturas supoñen incrementar nun 150% a superficie de grandes centros en Vigo, nun contexto no que o pequeno e mediano comercio viu desaparecer 1 de cada 4 establecementos durante a última década, e cando en moitos dos macrocentros existentes son cada vez máis os espazos baleiros.
A cidade conta na actualidade con 6 grandes superficies comerciais: Camelias, Praza Elíptica, Travesía, Gran Vía, A Laxe e Vialia, que suman un total de 175.000 metros cadrados. E cos proxectos das áreas comerciais de Cruceiro, Recaré ou Parque Comercial e de Lecer do PTL de Valadares, o Concello e Zona Franca pretenden aumentar outros 263.000 metros cadrados.
Plan de Dinamización Comercial
O portavoz municipal do Bloque tachou este modelo comercial de “absolutamente irracional, insustentábel e que só beneficia a grandes compañías e firmas transnacionais”. No seu lugar, defendeu a necesidade dun comercio “enraizado na propia cidade, de proximidade, asentando en todo o territorio para revitalizar o conxunto de barrios e de parroquias, e que ademais promova a produción local e galega”.
Entre as medidas propostas, ademais da moratoria de grandes superficies, o BNG demandou a posta en marcha dun Plan local de Dinamización Comercial en apoio do comercio local de Vigo, que é o único das sete cidades galegas que non recibiu ningunha axuda pública desde a pandemia. E tamén aos mercados municipais que, denunciou, están nunha “situación crítica pola falla de apoio” de Concello e Xunta.
Impacto no emprego
Igrexas asegurou que “cando desaparece o comercio de proximidade, as rúas perden actividade, relación social e vida, converténdose en espazos máis baleiros e menos seguros”. Pola contra, afirmou que as grandes superficies comerciais “non xeran emprego senón que desertizan o tecido comercial da cidade e impoñen un modelo de consumo que non xera retorno na cidade, nin apenas valor engadido, e que se sitúa nas antípodas da necesaria economía circular”.
Para o portavoz municipal nacionalista esta “concentración do consumo en poucas mans, cunha oferta comercial máis uniforme e dependente de decisións alleas” é a responsábel da desaparición de centos de pequenos negocios que non poden competir en condicións de igualdade e acaban pechando, co conseguinte impacto sobre o emprego e e a economía local.
Lembrou, a ese respecto, que os postos de traballo que xeran os grandes complexos adoita ser “máis precario, con xornadas parciais, menos dereitos laborais e menor estabilidade”. Aliás, afeou que este modelo fomenta o uso do coche particular, incrementando o tráfico e as emisións contaminantes, e representa un elevado consumo de solo e enerxía.
Terciarización da economía
O avance destas grandes áreas comerciais representa para o Bloque unha aposta pola terciarización da economía da cidade fronte ao peso dos sectores industriais. “Vigo ten que ser moito máis que unha cidade de servizos, ten que volver ser o potente pulmón industrial e produtivo do noso País e a capital galega da innovación, da tecnoloxía e das comunicacións”, defendeu Igrexas, advertindo da destrución de 7.000 postos de traballo na industria viguesa dende o ano 2009.
“O que precisamos non son máis macrocentros comerciais senón políticas públicas que poñan en marcha as enormes potencialidades produtivas que temos”, demandou o voceiro nacionalista, chamando a blindar o futuro de sectores chave como o naval, a automoción e o complexo mar-industria, xunto coa diversificación de novas actividades.
