Dous anos despois de aprobada a moción do Bloque na que se declarou formalmente Vigo como “cidade contraria a todas as formas de maltrato animal” o Goberno municipal non executou ningunha das 13 medidas concretas
Xabier P. Igrexas: “Avanzarmos cara unha cidade máis sustentábel pasa tamén pola adopción de medidas concretas que coloquen Vigo na vangarda do benestar animal”
O Bloque Nacionalista Galego reclama ao Goberno municipal de Vigo que execute as medidas que foron aprobadas polo Pleno en favor do benestar animal na cidade.
O portavoz municipal do BNG, Xabier P. Igrexas, lembra que en decembro de 2022 foi aprobada unha moción nacionalista en favor do benestar animal coa que o Pleno declaraba formalmente Vigo como “cidade contraria a todas as formas de maltrato animal, incluídas as touradas como expresión de tortura.
“Pero vemos como transcorridos máis de dous anos o Goberno municipal de Abel Caballero non aplicou nin unha soa das 13 medidas concretas que se recollían nese acordo plenario”, critica.
Igrexas subliñou que para o BNG “avanzarmos cara unha cidade máis sustentábel pasa tamén pola adopción de medidas concretas que coloquen Vigo na vangarda do benestar animal, despregando máis medios e recursos a esta finalidade así como actualizando o marco normativo municipal, co compromiso firme de nos configurar como unha cidade libre de maltrato animal”.
Medidas pendentes
Desde o BNG sinalan as medidas pendentes, como que Vigo continúa sen dotarse dunha nova Ordenanza municipal de Protección e benestar animal, e tampouco se teña superado o modelo exhibicionista de VigoZoo no que o único que se ten feito é un cambio de aparencia e convertelo nun parque multiaventuras en lugar de nun centro de recuperación e estudo da fauna e un espazo de sensibilización ambiental.
Ven ademais con “enorme preocupación” como a xestión privatizada a través dunha empresa non só non resolveu algunhas insuficiencias do Centro de Recollida de Animais da Madroa. Lonxe de avanzar para atinxir o obxectivo de “sacrificio cero”, como xa denunciaron semanas atrás, hai indicios de uso inxustificado da eutanasia veterinaria.
Tampouco se teñen despregado novos convenios de axuda a entidades non lucrativas de protección aninal, senón que se ten colocado a entidades históricas como a Sociedade Protectora nunha situación límite por falla de apoio municipal.
Ademais, continúa sen garantirse plenamente a aplicación do método CES (Captura, Esterilización e Solta) para controlar o número de gatos na rúa, nin tampouco se quixeron poñer en marcha de medidas preventivas e disuasorias para a fauna silvestre, así como a implementación de pasos seguros que eviten a sinistralidade vial.
Igrexas criticou que o Goberno de Caballero segue instalado en “anacrónicas políticas que impiden o acceso de animais domésticos a instalacións públicas, o servizo de bus ou o albergue da cidade, cando vemos como si poden acceder en calquera centro comercial”.
Aliás, o executivo local insiste inexplicabelmente na equivocación de limitar o acceso de animais só as praias da Calzoa e Foz, provocando unha elevada presión ambiental nesa contorna tal e como ten denunciado a veciñanza e colectivos ambientais.
Outras das medidas que non se teñen materializado son a renovación dos parques caninos da praza García Picher e da Ponte Nova e creación de novos espazos urbanos para o esparcemento canino; despregar un programa municipal de esterilización de animais domésticos, que inclúa a prestación gratuíta para persoas de baixos recursos; realizar un maior esforzo na promoción da adopción de animais; estudar a posta en marcha dun servizo veterinario municipal, con tarifas reducidas e servizos gratuítos para persoas sen fogar e de baixos recursos; e pular pola limitación estrita da práctica da caza en todo o termo municipal, cara a súa desaparición.
“Vemos como o Goberno municipal de Caballero continúa a virarlle as costas a unha cidadanía que ten a cada vez unha maior sensibilidade ambiental e un maior compromiso social cos dereitos dos animais”, remacha Igrexas. Por iso, desde o BNG reclaman que se executen as medidas acordadas polo Pleno co obxectivo de “referenciar Vigo na vangarda da protección do benestar animal”.
