Convocada unha charla coloquio, o venres 15 ás 20 h. no colexio público Manuel Cordo Boullosa, coa participación da portavoz municipal, Sol Seoane e a deputada no Parlamento Galego, Montserrat Prado
No último ano en Ponte Caldelas xubiláronse dous dos tres facultativos que tiña o centro de saúde. En vez de substituilos, o SERGAS limítouse a enviar de cando en vez algún -que non sempre- médico substituto. Este grave feito vese acrecentado coa baixa da médica titular, que tampouco se cubre.
Esta situación derivou en que o pasado luns, día 11, non foron atendidas todas as citas para atención presencial no centro de saúde porque o SERGAS non enviou os médicos necesarios, un feito que a portavoz do BNG, Sol Seoane cualificou de “absoluta falta de respeto” aos veciños e veciñas que estaban convocados para ser atendidos. “Parece que nin o seu tempo nin a súa saúde lles importen demasiado aos responsábeis do SERGAS”, afirmou a portavoz nacionalista.
O dereito a saúde das persoas é, para o BNG, innegociábel e que para iso é clave ter unha sanidade pública forte, que conte con todo o apoio en recursos humanos, económicos e de infraestruturas. Os problemas da atención primaria en Ponte Caldelas son coñecidos e son graves, e á falta de reposición das xubilacións e a non cubrición das baixas, hai que engadir a redución do horario de atención de pediatría, algo que perxudica aos nosos nenos e nenas e ás súas familias.
Charla-coloquio o venres 15
Para abordar os problemas da atención primaria, o BNG organiza unha charla coloquio o vindeiro venres, día 15. ás 20 h. no colexio público Manuel Cordo Boullosa, que contará coa participación da portavoz municipal do BNG, Sol Seoane, e a deputada no Parlamento galego, responsábel dos temas sanitarios, Montserrat Prado.