Manuel Fariña esixe que a Xunta modifique o Plan funcional do PAC para dotalo de dous equipos completos por turno
Unha vez máis o BNG leva ao vindeiro pleno municipal unha moción para esixir melloras na atención primaria de Caldas. En palabras do portavoz municial, Manu Fariña, “a veciñanza non se pode permitir sufrir demoras superiores as 3 horas para unha atención médica, porque a Xunta decidira reducir o persoal médico, o que obriga aos facultativos a atender a máis de 70 pacientes por turno.
“E fronte a isto, fronte as denuncias dos propios profesionais e das constantes mostras de rexeitamento por parte da veciñanza aos recortes na atención primaria no noso concello, temos que ver como o Director Xeral de Atención Primaria, Jorge Aboal, afirmou en tono burlesco que se a xente esperaba tanto era porque podían esperar e os seus problemas non eran tan urxentes” palabras que o edil nacionalista non dubidou en calificar como non só un descoñecemento da realidade do concello, senón como unha falta de respecto á veciñanza de Caldas de Reis.
Por iso o BNG solicita que o pleno do concello reprobe a Jorge Aboal e esixa á Xunta de Galiza que modifique o Plan Funcional do PAC de Caldas para dotalo de dous equipos de profesionais completos en cada turno, de xeito que se garanta a presenza de dous médicos e dous enfermeiros no servizo de urxencias extrahospitalarias
“Dende o BNG imos seguir traballando día a día para que os veciños e veciñas de Caldas conten coa Sanidade pública de calidade que merecen, e pola que tanto levan loitado” concluiu Fariña.