O BNG presentará un rogo ao equipo de goberno para que a película “O Corno” poida ser visualizada en Vilagarcía se esta non é incluida nos circuítos comerciais

O BNG, da man do seu voceiro, Xabier Rodríguez Paz, presentará neste Pleno ordinario municipal de Outubro un rogo para que o filme gañador da Cuncha de Ouro no Festival de Cine de Donostia 2023, “O Corno”, poida ser visto en Vilagarcía, de ser a nosa vila excluída dos circuítos comerciais. Este filme da directora Jaione Camborda, ambientado no mundo do marisqueo na Arousa dos anos 70, e rodado integramente en galego, acaba de facer historia ao merecer este galardón de dimensións internacionais. Perante a nova de que Vilagarcía vai estar excluída da súa exhibición, dentro das sete cidades, así como da relación de vilas galegas de menor entidade, o BNG considera que a Concellería de Cultura podería explorar a posibilidade de contactar coa produtora para a súa estrea en centros culturais da nosa vila.