Os nacionalistas sinalan que a incapacidade de xestión do Goberno do Partido Popular traduciuse en problemas crónicos que se rexistraron durante toda a tempada estival, como a falta de espazos para estacionar, o colapso do tráfico, o mal funcionamento de servizos básicos como a recollida do lixo e o abandono do rural
O voceiro do Bloque, Fran Leiro, ten claro que a imaxe que
trasmitiu o concello durante estes meses “está nas antípodas da seriedade, a limpeza e o bo funcionamento que caracteriza a un destino turístico de tanta relevancia”
O verán de 2024 será lembrado como un dos máis caóticos dos últimos anos, consecuencia da nefasta xestión e da política de cemento de Telmo Martín. Así de contundente se amosa o Bloque Nacionalista Galego (BNG) de Sanxenxo á ahora de facer unha análise do acontecido no municipio entre os meses de xuño e agosto, nos que quedou patente a incapacidade do equipo de Goberno do Partido Popular para xestionar á altura do que merece a veciñanza e un destino turístico de referencia a todos os niveis. “Telmo Martín deixa a imaxe do concello nas antípodas da seriedade, a limpeza e o bo funcionamento que nos debe caracterizar”, critican os nacionalistas.
A falta de estacionamentos no centro de Sanxenxo e nas proximidades, a situación de insalubridade rexistrada en diferentes puntos das parroquias pola insuficiencia de frecuencias da recollida do lixo, o abandono do rural ou o colapso do tráfico, sen apenas dispositivos de seguridade habilitados, son algúns dos exemplos dos problemas e molestias que tiveron que padecer os veciños, veciñas e visitantes desde o inicio da tempada estival. Tal e como incide o voceiro do Bloque, Fran Leiro, “non estamos falando de situacións puntuais dunha data en concreto, senón dunha constante desde xuño ata setembro”. Xa antes da chegada do mes de xullo “as persoas residentes en núcleos como o de Sanxenxo non tiñan donde estacionar”, recorda Leiro, que tilda de “fracaso absoluto” a
ocurrencia de Telmo Martín da lanzadeira de transporte entre a vila e o polígono de Nantes. “Desde o BNG sempre defenderemos a necesidade de apostar polo transporte público, pero dun xeito serio e eficiente e non como mera propaganda, que foi o que fixo o señor Martín”. Proba disto é que a explanada habilitada para aparcar vehículos no parque empresarial ficou baleira practicamente durante todo o verán.
Esta falta de estacionamento súmase á incapacidade do Goberno local de ter previstos dispositivos especiais para controlar o tráfico, producíndose retencións e o colapso da circulación en moitos lugares, sendo especialmente conflitivo o punto no que se atopa o novo semáforo da Rúa Progreso.
A xuízo dos nacionalistas, os problemas derivados da pésima xestión da recollida do lixo só é unha proba máis do “peor verán dos últimos anos” protagonizado polo Goberno local do Partido Popular e por Telmo Martín, quen “sube impostos á veciñanza e mellora o seu soldo ao tempo que deixa en precario o funcionamento de moitos servizos básicos”, conclúe Leiro. Esta deficiencia repetiuse en varias ocasións, nalgúns casos en lugares céntricos, xerando “unha situación de insalubridade e unha imaxe de abandono impropia dun concello como Sanxenxo”. A isto hai que sumarlle a precaria situación no rural, con numerosas pistas e zonas públicas que se atopan nun evidente estado de abandono, a pesares das queixas reiteradas de moitos veciños e veciñas. Ademais, tal e como recorda Fran Leiro, este ano o Concello reduciu o número de actividades nas parroquias máis pequenas correspondentes ao programa de verán, o que supón “unha falta de respecto máis cara a veciñanza destas localidades e unha clara mostra de que ao señor Martín só lle interesa o que sucede nos arredores de Silgar e do Porto Deportivo”.
Por último, desde o BNG auguran que esta pésima xestión continuará ao longo do ano, nun mandato no que “ata o de agora no único que se mellorou foi nos soldos de Telmo Martín e do seu equipo de Goberno, cortesía das subas de impostos perpetradas en apenas un ano”.
