• O concelleiro de de Promoción Económica e Urbanismo, o socialista Gregorio Agís, sinala que a actuación contará cun orzamento que ascende a máis de 937.000 euros, IVE engadido, financiado a través do Programa Reacpon e do Plan Concellos da Deputación de Pontevedra
• A obra, que dará comezo nas vindeiras semanas, suporá “un antes e un despois” para esta zona de San Salvador, que contará con novos servizos e verá mellorada a humanización, a seguridade e a mobilidade sostible
A empresa Construcciones Obras y Viales Sociedad Anónima (COVSA) será a encargada de executar a rehabilitación integral e de mellora sostible na Puntada, Portosanto e Saíñas, un dos principais núcleos da parroquia de San Salvador. A Xunta de Goberno Local aprobou na súa última sesión a adxudicación do proxecto, logo de que se presentasen ao concurso de licitación catro firmas. O orzamento ascende a un total de 937.752,60 euros, IVE engadido, e finánciase nun 80% a través do programa ReacPon da Deputación de Pontevedra. O 20% tamén se cubrirá con fondos provinciais.
Así o confirmou o concelleiro de Urbanismo e Promoción Económica, Gregorio Agís (PSdeG-PSOE), cuxo departamento foi o responsable de impulsar a actuación e tramitar a obtención das axudas. “Estamos a falar dunha obra de gran calado, que suporá a completa transformación dunha contorna que actualmente se atopa nun estado de degradación importante e que suporá un antes e un despois para a veciñanza desta zona de San Salvador”, salientou.
Unha vez completado o proceso de licitación, Agís sinala que os traballos darán comezo nas vindeiras semanas, de xeito que, salvo imprevisto, a obra estará en marcha no verán. “A diferencia do que ocorre noutros emprazamentos do concello, nesta zona a tempada estival non supón un impedimento para a realización da actuación. De feito, en lugares como Saíñas, onde se atopa a escola infantil, é unha vantaxe, polas vacacións”, indica o responsable de Urbanismo, que incide en que “trataremos de que as obras xeren as menores molestias posibles á veciñanza”. O Concello contempla a finalización do proxecto para a primavera de 2023.
As obras incluirán a renovación e dotación de servizos básicos, así como a humanización de diferentes espazos, facendo especial fincapé na seguridade peonil e na redución da pegada de carbono, respectando en todo momento as construcións tradicionais. Ademais, desde A Puntada se traballará tamén na posta en marcha dunha senda costeira ata Pontevedra.
Gregorio Agís lembra que o proxecto foi dado a coñecer á cidadanía durante a fase de redacción.
O edil do Goberno local lembra, ademais, que esta actuación, unha das más ambiciosas a executar durante o actual mandato e que segue a filosofía do Concello de revitalizar e poñer en valor os núcleos tradicionais e a mobilidade sustentable, contou co rexeitamento do Partido Popular de Poio.
