A Xunta de Goberno Local do Concello da Estrada ten previsto aprobar o vindeiro luns a adxudicación á empresa Movimientos de Áridos y Construcciones Arosa S.L. das obras de asfaltado de viais na parroquia de Curantes por un importe de 114.757 euros.
Esta actuación, que será financiada a través do Plan Concellos e terá un prazo de execución de dous meses, consistirá na limpieza de cunetas e a mellora do firme dos viais dos seguintes lugares da parroquia: A Barreira, Cortes, Igrexa, Campo da Festa, A Nogueira, O Porto, As Pereiras e Curantes Vello.
Por outra banda, a Xunta de Goberno Local tamén aprobará o luns a adxudicación en 43.811 euros á firma Tecesa Acústica Visual S.L. da modernización do equipamento de son e iluminación do Teatro Principal da Estrada, así como a construción dun vestíbulo previo á zona de butacas.