Nace con 33 compoñentes e estará dirixido por Juan Alén Castro. Inspirarase no pensamento e na formación musical do grande músico de Antas Hixinio Cambeses a quen lle rinden homenaxe
O Concello da Lama anuncia para este domingo 10 outubro o concerto de presentación da nova Banda de Música Municipal da Lama composta por máis de 30 membros e dirixida por Juan Alén Castro, músico veciño de San Adrián de Calvos (Fornelos de Montes).
Coa posta en marcha desta agrupación musical recupérase a tradición bandista na Lama onde os veciños e veciñas do municipio gardan lembranzas das antigas Bandas de Música como a “Celta” de Antas e do prestixioso músico e compositor lamense Hixinio Cambeses.
Precisamente unha das obras compostas por Hixinio Cambeses, “A noite do Santo Cristo” inspira o logotipo da nova agrupación musical que ademais de ter representado o escudo da Lama e unha lira tamén recolle sobre nun pentagrama a primeira estrofa desa vella composición do mestre de Antas.
Un acordo entre un grupo de músicos da contorna e o Concello da Lama permite agora recuperar esa tradición coa posta en marcha da Banda de Música Municipal da Lama a través dun convenio que permitirá a esta agrupación ensaiar e dispoñer da axuda, da cobertura e dos recursos municipais ao tempo que levará o nome da Lama polos distintos lugares de Galicia a través da música dos seus concertos.
Segundo o concelleiro de Cultura e Deportes, Daniel Vidal, “é un fito longamente desexado pola nosa veciñanza que agora convértese en realidade. Ese é o primeiro paso para ir recuperando, pouco a pouco, a afeción da Lama polas bandas e a súa música. Esperamos tamén que esto sexa o xérmolo formativo das novas xeracións interesadas no mundo da música e que terán nesta Banda de Música Municipal da Lama un elemento fundamental para apoiar a súa formación e animar aos máis novos a seguir os pasos dos grandes músicos que tivo A Lama como foron D. Hixinio Cambeses, os irmáns D. Benigno e D. Luciano Ogando e D. José Sanjurjo, de Antas, D. Laureano Ventín, de Gaxate; D. Albino Martínez, de Fornelos, ou Don Roxelio, o ilustre e benquerido cura de Xende”, indicou o concelleiro.
ESTA BANDA DE MÚSICA, HOMENAXE VIVA A HIXINIO CAMBESES
O responsable de Cultura do Concello, Daniel Vidal, salientou tamén o compromiso desta Banda coa formación e a educación musical que tentarán extender nun futuro próximo á mocidade “seguindo os pasos e a inspiración de Hixinio Cambeses quen supuxo un enorme orgullo para os veciños e veciñas da Lama. Esta Banda vén representar unha homenaxe viva a Hixinio Cambeses no 120 aniversario do seu nacemento, que non se pudo conmemorar como é debido por mor da pandemia o pasado ano e que agora recuperar a súa razón de ser co nacemento da Banda de Música Municipal da Lama, que seguro sería un soño tamén para el”, concluiu Vidal.
