O Concello de Baiona mostra aos seus veciños e visitantes como capturar as mellores postas de sol das Rías Baixas
Os amantes da fotografía terán unha cita práctica o mañá luns 18 de agosto, ás 20 horas, para iniciarse e perfeccionar a técnica. Será a penúltima actividade do ciclo “Entre Lusco e Fusco”, orientada a participantes con niveis de iniciación ou medio. O único requisito que se contempla é manter unha actitude aberta á aprendizaxe.
Fernando Rey Daluz, biólogo experto en imaxe científica e astronómica, e produtor multimedia, será o encargado de transmitir os coñecementos necesarios para sacar o mellor partido ás instantáneas, aproveitar a luz do atardecer, expoñer en contraluz, compoñer e seleccionar adecuadamente localizacións e elementos como nubes, reflexos ou siluetas, aplicacións e realizar os axustes necesarios para un óptimo impacto visual.
O punto de saída será a estatua de Martín Alonso Pinzón e as prazas son limitadas, polo que será necesaria a inscrición previa na propia Casa da Navegación de Baiona, a través do teléfono 986 356 688 ou do correo electrónico casa.navegacion@baiona.gal
