- O pleno da corporación aprobou a concesión á empresa Proyecon Galicia, cun orzamento de 1.478.480,85 €
- O proxecto propón actuacións que converterán esta instalación nun referente a nivel de eficiencia enerxética
O Concello de Bueu adxudicou a obra de reforma enerxética e rehabilitación integral do Pavillón de Beluso, por un orzamento de 1.478.480,85 € e un prazo de execución de cinco meses. A proposta aprobouse este martes pola mañá nun pleno extraordinario urxente e contou cos votos favorables do BNG, PSOE e do concelleiro non adscrito Daniel Chapela, mentres que o PP se abstivo.
Félix Juncal, alcalde da vila, explicou durante a sesión que “se trata dunha adxudicación urxente pola xustificación da subvención da Xunta en novembro”. Elena Estévez, dende as bancadas do PP, manifestou que “isto é unha carreira a contrarreloxo e como oposición temos dereito a dispoñer dun tempo mínimo e necesario para ver e estudar os expedientes, polo que espero que este xeito de proceder sexa unha excepción”. Daniel Chapela manifestou que “non teño problema en que se convoque un pleno de onte para hoxe, porque entendo as razóns deste expediente, pero a información debería trasladarse antes aos concelleiros e non que nos enterásemos a través dos medios de comunicación”.
Xosé Leal, concelleiro de facenda e contratación pública, puxo o foco en que “o Concello está capacitado para licitar expedientes de contratación superiores ao millón de euros que antes eran impensables”.
A reforma do Pavillón de Beluso solucionará os problemas que a instalación deportiva arrastra dende hai tempo, case dende a súa inauguración no ano 2007, como a humidade nos vestiarios e as filtracións de auga da chuvia que entran pola cuberta, pero tamén aplicará conceptos adaptados aos tempos que vivimos, como a eficiencia enerxética, a sustentabilidade ambiental, a accesibilidade ou a habitabilidade.
O proxecto, de gran interese para a cidadanía e os clubs usuarios, contempla a reforma para dar solución ás deficiencias, pero pretende ser un proxecto de reforma integral. Entre as propostas, están a apertura de varias ventás para dotar de luz natural á pista, a instalación dunha nova fachada ventilada con illamento térmico, ou a mellora do illamento e a impermeabilización da cuberta levando a auga cara ao exterior. Así mesmo forraranse as paredes interiores con paneis acústicos, farase unha instalación na cuberta con paneis fotovoltaicos e renovaranse todas as instalacións do edificio por unhas de alta eficiencia enerxética. O proxecto tamén servirá para reforzar a seguridade, a través de accións como a substitución de tódalas varandas que non cumpren coa normativa actual, por exemplo as das gradarías, que se substituirán por vidros que ademais melloran a visibilidade da pista.
Na planta baixa, a nova distribución permitirá contar con catro vestiarios de equipo e dous de árbitros, todos eles accesibles para persoas con mobilidade reducida. Na planta alta, situaranse os aseos do público feminino, masculino e mobilidade reducida; neste último, incorporarase un lavabo para persoas ostomizadas. A pista será dun pavimento deportivo con acabado en madeira para unha maior flexibilidade nas diferentes disciplinas deportivas, xa que este pavimento é o único que permite o seu uso tanto aos deportes de pelota coma aos de patinaxe. Dotarase tamén o pavillón cun vídeo marcador de dez metros cadrados de superficie, así como dunha instalación de música e son.
O Concello conseguiu unha subvención da Secretaría Xeral para o Deporte da Xunta de Galicia, outra da Deputación de Pontevedra e unha operación de crédito bancaria para poder financiar a obra.
