• A mostra, que conta coa colaboración do Colexio de Arquitectos de Galicia, poderase visitar ata o 14 de febreiro na Sala Amalia Domínguez Búa en horario de 10.00 a 20.00 horas
• O próximo venres, 7 de febreiro, terá lugar ás 20 horas unha charla – coloquio coas arquitectas María Fandiño e Miriam García, autoras da proposta gañadora “Banda da Ribeira”
A Sala de Exposicións Amalia Domínguez Búa acolle dende esta semana unha exposición dos cinco traballos gañadores do Concurso de Ideas da Banda do Río, que se poderá ver ata o 14 de febreiro en horario de 10.00 a 20.00 horas. Esta mostra foi organizada polo Concello de Bueu en colaboración co Colexio de Arquitectos de Galicia para dar a coñecer as propostas para este barrio a toda a veciñanza. Así mesmo, o vindeiro 7 de febreiro, organizarase ás 20 horas un acto no Centro Social do Mar no que as arquitectas María Fandiño e Miriam García, autoras da proposta gañadora “Bandas da Ribeira” explicarán as súas ideas para a mellora integral deste barrio mariñeiro, polo que se convida a toda a cidadanía interesada a asistir e a coñecer de primeira man a proposta.
Ao certame, convocado a comezos do pasado ano, concorreron dezasete traballos, de entre os que o xurado elixiu cinco gañadores, que son os que agora se poden ver nesta mostra. Concretamente serán “Bandas da ribeira”, de María Fandiño e Miriam García; “Praia, Barrio, Braña”, dos arquitectos composteláns Miguel Silva Barral e Manuel Lajos Couselo; “Banda Batente”, do estudo coruñés Costas Pedrós Arquitectos SLP, con Roberto Costas Pérez, Óscar Pedrós Fernández e Fernando Fernández Paéz; “Litoralia”, dos madrileños Eduardo Roig Segovia e Nieves Mestre Martínez; e “Convergencia de paisajes”, dos barceloneses Narcís Font Juan, Juan José Vargas Castillo, Johana Martínez Pineda e Germán Paipa Camargo.
O concurso de ideas supuxo un paso importante para o Concello, pois a través del e de todo o proceso previo anterior recolléronse as múltiples sensibilidades do barrio, tal e como foran acordadas hai anos nas diversas mesas de seguimento coas partes implicadas, é dicir, a Plataforma Veciñal da Banda do Río e a Asociación Veciñal da Banda do Río.
O concurso foi posible grazas a un convenio asinado co Colexio Oficial de Arquitectos de Galicia (COAG) e nel participaron equipos compostos por profesionais con competencias na materia de ordenación urbanística e medioambiental. O ámbito de localización comprende o cuadrilátero delimitado polas rúas Johan Carballeira, ata Can do Penedo, incluíndo ambos os lados da Avda Montero Ríos e da rúa Pazos Fontenla, cunha superficie aproximada de 61.500 metros cadrados. Precisamente os proxectos que finalmente se desenvolvan a partir destas propostas seleccionadas deberán cumprir rigorosamente coa normativa vixente e os estándares técnicos aplicables en cada caso, co fin de que teñan un impacto positivo e sostible nas comunidades e no territorio.
