• O Goberno local anima á poboación maior de 60 anos a participar nas enquisas que se enviarán aos domicilios, e que tamén se poderán completar de maneira ‘on line’, para “coñecer de primeira man as necesidades e propostas” deste sector da poboación local
• “Cada resposta contribuirá a facer da nosa vila un lugar máis inclusivo, accesible e cómodo”, sinala o alcalde, Jacobo Pérez, que lembra que este ano se inaugurará o novo Fogar do Maior, ademais do espazo de lecer específico para persoas maiores na Tafona
Optimizar e planificar actividades, accións e actuacións que melloren a calidade de vida das persoas maiores de Caldas de Reis é o obxectivo da nova campaña informativa impulsada polo Concello. Trátase dunha iniciativa que, tal e como explica o alcalde, Jacobo Pérez, “servirá para coñecer de primeira man as condicións de vida da nosa xente da terceira idade e estar ao tanto das súas necesidades reais”. Para iso, desde a Administración local enviaranse a centos de vivendas de todas as parroquias unha enquisa e unha carta explicativa, na que se da conta da importancia de participar nesta proposta, algo totalmente voluntario e que “resultará moi útil, xa que cada resposta contribuirá a deseñar unha vila máis inclusiva, accesible e cómoda, adaptada á necesidade dos nosos e as nosas maiores”, recalca o rexedor caldense.
A enquisa consta dunha serie de preguntas, a través das cales se solicita información de interese, como idade e xénero das persoas participantes, así como a súa situación en canto a saúde e benestar, vivenda, uso dos Servizos Sociais, nivel de coñecemento en aspectos tecnolóxicos e un apartado no que poden achegar as súas propostas e suxestións. O Concello incide no aspecto voluntario da campaña e recalca que se garante a protección de datos, cumprindo en todo momento coa normativa vixente. A través das respostas, o Goberno local farase unha idea moito máis real e aproximada sobre o estado de saúde emocional e o nivel de apoio social que reciben e precisan as persoas da terceira idade. Ademais, tamén se poderán detectar barreiras arquitectónicas en viais públicos ou en equipamentos municipais, ao tempo que se avalía o grao de coñecemento que este sector da sociedade ten das prestacións que desenvolve o propio Concello, a través do departamento de Servizos Sociais, o Servizo de Axuda no Fogar (SAF) ou a teleasistencia. Por último, o alcalde sinala que se recollerán “todas as propostas e ideas que a xente nos queira achegar para a analizar a posible organización de actividades ou o desenvolvemento de proxectos que poidan axudar a mellorar a súa calidade de vida”.
Nas cartas que se enviarán á veciñanza incluirase, ademais da enquisa, unha carta informativa, asinada polo propio alcalde, na que se fai fincapé na importancia de participar na campaña, algo “que resulta fundamental para adaptar as iniciativas municipais ás demandas reais da poboación maior”. Desde o Concello tamén se fai un chamamento ás veciñas e veciños con familiares de máis de 60 anos a que se impliquen na iniciativa, axudando aos seus achegados a completar a enquisa. Unha vez completados, os cuestionarios poderanse entregar no Fogar do Maior, nas dependencias de Servizos Sociais ou no ddespacho da traballadora social, no Centro de Saúde de Caldas de Reis. Ademais, o Concello tamén ofrece a opción de realizar a enquisa ‘on line’, a través dunha ligazón que compartirá nos seus perfís oficiais nas redes sociais, ou ben a través dun código QR.
Jacobo Pérez recorda que un dos obxectivos prioritarios do Goberno local neste mandato é impulsar infraestruturas e servizos que redunden na mellora de calidade de vida e na comodidade das persoas maiores. Seguindo esa premisa, este mesmo ano inaugurarase o novo local do Fogar do Maior, moito máis amplo e céntrico, e se están a desenvolver traballos para dar vida ao Parque do Maior na Tafona.
