• O alcalde, Jacobo Pérez, salienta o incremento da partida, que supón unha suba de máis do 40% con respecto ao documento anterior, e defende a importancia de contar cun servizo que facilita o bo estado dunha gran extensión de ramais e vías das diferentes parroquias da vila
• As empresas interesadas dispoñen de 15 días hábiles para presentar as súas ofertas para optar a un contrato que estará vixente ata o 31 de decembro deste ano
O Concello de Caldas de Reis abriu o proceso de licitación necesario para contratar os traballos de limpeza e mantemento das cunetas nos camiños municipais do rural. Unha xestión que é de suma importancia, tal e como salienta o alcalde, Jacobo Pérez, que salienta a necesidade de consolidar e garantir o bo estado destes ramais e vías nas diferentes parroquias, co obxectivo de evitar acumulacións de auga en épocas de chuvia e garantir a seguridade tanto da circulación de vehículos como dos e das viandantes.
Tal e como figura no pliego de condicións, a empresa adxudicataria asumirá os labores de retirada de sedimentos, restos vexetais ou diferentes obstáculos que afecten á libre circulación da auga polas cunetas. Ademais, levarase a cabo unha limpeza periódica, intensa e profunda para garantir unha conservación óptima destes espazos. Neste sentido, o alcalde Pérez Gulín sinala a importancia de poder contar cun servizo que garanta a realización destes traballos ao longo de todo o ano. “Non hai que esquecer que Caldas de Reis conta cunha superficie que se achega aos 70 quilómetros cadrados, moitos dos cales pertencen a zonas rurais”, indica. Esta dispersión impide que a brigada municipal poida asumir esta actuación, de aí a necesidade de sacala a licitación. “Evitamos, deste xeito, moitas demoras e acadamos unha maior axilidade nas actuacións”, engade o rexedor.
Unha das principais novidades do contrato ten que ver co seu orzamento. A partida proposta polo Concello de Caldas de Reis ascende a un total de 90.000 euros, IVE engadido, o que se traduce nunha suba de aproximadamente un 40% con respecto ao documento anterior. Jacobo Pérez recorda que a posta a punto do rural é un dos obxectivos primordiais do Goberno municipal. “Son estas as pequenas grandes actuacións que inciden nunha mellor calidade de vida da nosa veciñanza”, enfatizou. As empresas interesadas en participar no concurso de licitación dispoñen dun prazo de 15 días para presentar as súas ofertas. Este orzamento cúbrese con fondos propios da Administración local.
O contrato establece dous tipos de traballos. Por unha banda, atópanse os encargos regulares, que inclúen a limpeza de zonas, co uso de retroexcavadora e motoniveladora sempre que sexa necesario. Para a realización destas tarefas a adxudicataria contará cunha marxe de tres días hábiles, a partir do día seguinte
do envío do encargo por parte do Concello. O segundo grupo de labores corresponde aos de tipo urxente, que deben completarse nun período máximo de 24 horas. Figurarían aquí as actuacións destinadas ao desatascamento de cuentas para evitar danos materiais ou en situacións que poidan condicionar o tránsito de vehículos e de peóns. O contrato estará vixente ata finais de 2025.
