• O proxecto licítase por preto de 45.000 euros e inclúe a dotación dunha pista de petanca, un área para xogar á chave e elementos bisaudables
• O alcalde, Jacobo Pérez, salienta o carácter
interxeracional da Tafona, que pasará a ser punto de encontro e de lecer para persoas de todas as idades, logo da inauguración da nova pista polideportiva
O Concello de Caldas Reis acometerá a dotación dun parque para persoas da terceira idade na Tafona, nunha parcela duns 900 metros cadrados, entre os ríos Umia e Bendaña. O alcalde, Jacobo Pérez, incide en que esta zona será “un punto de encontro para os nosos e as nosas maiores, no que poderán compartir xuntos tempo de calidade, ademais de practicar diferentes xogos tradicionais e levar unha vida saudable”. O proxecto, que será aprobado esta semana en Xunta de Goberno, contará cun orzamento inicial que ascende a 44.744,74 euros, IVE engadido. Esta nova instalación contará cunha pista de petanca, ademais dun espazo para o tradicional xogo da chave. A maiores, a actuación incluirá a dotación de cinco elementos biosaudables, nos que se poderán realizar distintos exercicios de mantemento, e que contarán cos correspondentes paneis informativos sobre o seu uso. Procederase, asemade, á dotación de mobiliario composto por bancos e meses, ademais de asentos rústicos de pedra, respectando en todo momento o espazo da contorna. O proxecto ten en conta tamén a realización dos pertinentes traballos de reforzo do pozo de cachotería que existe na zona. Por último, habilitarse unha fonte de auga potable, que contará con dous grifos, un para persoas e outro para mascotas.
O prazo de execución dos traballos, unha vez se complete o pertinente proceso de licitación, será de tres meses. O alcalde de Caldas de Reis lembra que un dos obxectivos prioritarios do Goberno local é dar resposta ás necesidades da xente maior. “Dentro da nosa folla de ruta para mellorar e garantir unha boa calidade de vida para a nosa veciñanza, temos moi en conta o que precisan as persoas da terceira idade e estamos convencidos de que este parque acabará consolidándose como un lugar de encontro no que socializar e practicar hábitos saudables”, sinalou o alcalde. Neste sentido, Pérez Gulín incidiu na importancia de que o parque da terceira idade se emprace nun lugar tan emblemático como é A Tafona. Hai que lembrar que hai apenas uns meses que o Concello inaugurou a nova pista polideportiva, polo que “seguimos traballando para consolidar este espazo como unha zona multidisciplinar e interxeracional, sendo un referente non só dentro do noso concello, senón en toda a bisbarra”.
O proxecto conta con todos os permisos necesarios. Neste sentido, o Concello de Caldas de Reis xestionou as autorizacións pertinentes doutros departamentos, como é o caso da Dirección Xeral de Patrimonio. Este requisito era necesario, ao atoparse a parcela dentro da área de respecto dos xacementos arqueolóxicos do Asentamento Romano catalogado no Plan Xeral de Ordenación Municipal (PXOM).
Durante o desenvolvemento das obras levarase a cabo un control arqueolóxico sobre os desterros ocasionados polos traballos. Ademais, a actuación tamén conta cos informes favorables de Augas de Galicia.
