O Concello o encadra na súa programación cultural para festexar o 150 aniversario do seu nacemento ao supor o Templo Votivo unha das súas obras cume
Ao programa de andainas de xullo suma en agosto dúas por Monteferro e outras dúas sobre a novela ‘A praia dos afogados’ de Domingo Villar e ‘A Niza galega’ en Praia América. En todas é preciso inscribirse previamente
O Concello de Nigrán estrea este sábado 27 de xullo un roteiro adicado ao célebre arquitecto galego Antonio Palacios, autor do Templo Votivo de Panxón, considerada unha das súas obras cume. O municipio continúa así coa conmemoración do 150 aniversario do seu nacemento no Porriño, xa que a inicios de ano o Concello editou o libro ‘O legado de Antonio Palacios en Nigrán’, do experto Álvaro Bonet, e un folleto turístico que presentou na pasada Feira Internacional de Turismo de Madrid (FITUR) e no que se basea esta andaina na que, como en todas as demáis, é preciso inscribirse previamente en oficinaturismo@nigran.org . A mesma repetirase o mércores 7 de agosto e sábado 24 de agosto.
“Palacios é a Madrid o que Gaudí a Barcelona; coa gran sorte de que en Nigrán contamos coa súa construción relixiosa máis importante, o Templo Votivo de Panxón, ademais dun chalé da súa autoría en Praia América. Moita xente de fora de Galicia que o admira o descoñece e nos interesa especialmente achegarnos a ese turismo de calidade e que a veciñanza valore este tesouro patrimonial”, reflexiona o rexedor, Juan González, quen aposta pr sumar esta nova actividade cultural e turística a roteiros tan consolidados e con tanto éxito como ‘A praia dos afogados’ por Panxón, baseado na novela homónima de Domingo Villar e pola que tamén apostamos en FITUR 2023.
Os asistentes ao roteiro recibirán este folleto, deseñado para poder levar cómodamente no peto, no que se ofrece información sobre o Templo Votivo, o chalé de Sileno en Praia América, e a igrexa de Santiago de Parada (neste caso para poder contrastala cos debuxos que realizou animado seguramente polo seu interese polo románico). Estas son as tres pegadas de Antonio Palacios en Nigrán.
Máis roteiros en agosto
No mes de agosto o Concello de Nigrán ofrece o día 3 o roteiro ‘A Niza galega’ por Praia América (10:00 horas), os días 10 e 21 sendos roteiros ‘Os segredos de Monteferro’ (10:00 e 17:00 horas respectivamente) e o 17 e 28 ‘A praia dos afogados’ por Panxón (10:00 horas). En todos os casos é imprescindible inscribirse previamente a través do mail oficinaturismo@nigran.org achegando nome, apelidos e teléfono de contacto. Para calquera información adicional está habilitado o número de teléfono 699859418 de luns a venres de 9:30 a 14:00 horas.
