O Concello ofrece a un total de 208 persoas maiores de 60 anos os obradoiros anuais ‘Vivilo Corpo’, Informática e ‘Exercitar a Memoria’
O Concello de Nigrán inicia esta semana coas 208 prazas cubertas os tres cursos municipais do programa ‘Envellecemento activo’ dirixido a maiores de 60 anos empadroados no municipio. Estes obradoiros anuais están dirixidos a reforzar a autonomía e previr o illamento social.
Facer exercicio, manter a mente activa e non illarse socialmente son os tres eixos que os especialistas recomendan levar adiante para previr deterioros cognitivos, e neles se basa este programa que ofrece o Concello de Nigrán a través da Concellería de Maiores dirixida pola edil María Mayán.
O caracter fundamental do programa é preventivo, a súa finalidade é a de garantir unha maior calidade de vida aos nosos maiores tratando de evitar ou atrasar a aparición de problemas de memoria, deterioro cognitivo, Alzheimer e doutros problemas de saúde e de incapacidades; pero tamén de mellorar aqueles que se poidan ter na actualidade e de acadar un maior grado de autonomía e independencia. “Apostamos por políticas que garantan a calidade de vida dos maiores, tamén con turismo social, teatro, bailes e mesmo o centro especializado en demencias neurodexenerativas en Panxón, que é 100% municipal”, indica o alcalde de Nigrán, Juan González, quen acudíu esta mañá a inaugurar o inicio do curso.
