A actividade será guiada e terá unha duración aproximada de tres horas
O Concello de Pazos de Borbén recupera outra das súas iniciativas que foron suspendidas pola Pandemia, o seu tradicional roteiro de paseo polos montes de Nespereira coincidindo coa festa gastronómica desta parroquia, a Festa do Ovo. O grupo partirá do Torreiro de Nespereira ás 10 da mañá e ten previsto o seu retorno ao redor das 13 horas, xusto a tempo para participar na celebración culinaria.
A iniciativa é totalmente gratuíta para todos os asistentes e non precisa inscrición previa. O seu obxectivo é dar a coñecer o patrimonio natural desta parroquia e, para iso, o grupo contará cun guía que divulgará as peculiaridades, os usos tradicionais e a historia dos montes da contorna de Nespereira.
O alcalde de Pazos de Borbén e veciño desta parroquia, Andrés Iglesias, animou a todos os veciños e visitantes a participar no roteiro de sendeirismo previa á celebración. “Para ir abrindo o apetito e, de paso, gozar duns momentos de lecer nunha contorna natural privilexiada”, concluíu o rexedor.