• A Mesa da Defensa dos Dereitos da Sanidade de Poio acorda adherirse a esta campaña, que cristalizará coa aprobación dunha moción no vindeiro Pleno ordinario
• O presidente do órgano local, Xosé Luís Martínez (BNG), informa tamén de que se solicitará ao Sergas información sobre a situación do persoal sanitario en Poio, da cal se dará traslado aos colectivos locais, de cara á organización de posibles mobilizacións e actuacións reivindicativas
A Mesa da Defensa dos Dereitos da Sanidade, na que está representada toda a Corporación municipal e que preside o titular deste departamento a nivel local, Xosé Luís Martínez (BNG), acordou na súa sesión deste xoves sumarse ao apoio da Iniciativa Lexislativa Popular (ILP) promovida pola Plataforma SOS Sanidade Pública de Galicia, a través da cal se lle esixe ao Parlamento de Galicia que aprobe unha serie de medidas encamiñadas á mellora urxente do sistema sanitario.
Entre elas, saliéntase a necesidade de establecer a atención presencial como regraxeral para as consultas médicas, a fixación duns mínimos de persoal para salvagardar a calidade de atención aos e ás pacientes, acabar coa precariedade laboral dos e das profesionais e reabrir consultas e PACs pechados nos últimos anos. A través deste acordo tamén existe un compromiso de colaborar de xeito activo na recollida de sinaturas e nas mobilizacións e campañas informativas de carácter unitario que se realicen para ter unha Atención Primaria de calidade.
Durante a sesión acordouse tamén corroborar este apoio a través dunha moción que será aprobada no vindeiro Pleno ordinario, que terá lugar o martes 27 de setembro. A maiores, Xosé Luís Martínez confirmou que o Concello solicitará ao Sergas información sobre o número de profesionais existentes nos ambulatorios e centros de saúde de Poio. “Faremos a petición en outubro e, unha vez obteñamos ese dato, convocaremos ao tecido colectivo de Poio para estudar posibles medidas a tomar”, adiantou. Neste sentido, Martínez Blanco advirte de que “a situación sanitaria no noso municipio está peor ca nunca. As listas de agarda non deixan de medrar e practicamente só se están atendendo Urxencias. É un contexto especialmente grave nesta época, na que están a piques de iniciarse campañas de vacinación contra a gripe ou a cuarta dose contra a COVID-19 para persoas maiores”, alertou o concelleiro de Sanidade.