O alcalde, Ricardo Martínez, destinará este vehículo á brigada de obras, servizos e medio ambiente para prestar mellor atención á veciñanza
O alcalde Ricardo Martínez, a concelleira Ana Peña e varios técnicos municipais recepcionaron esta mañá a furgoneta eléctrica adquirida polo Concello de Portas para prestar servizo como vehículo da brigada de obras municipal e medio ambiente e que contou coa subvención da Xunta de Galicia a través do Fondo de Compensación Ambiental.
A furgoneta eléctrica foi adquirida a través dun concurso público que saiu a contratación por un valor estimado de 39.809 euros e que foi adxudicada a Dalonga por un importe de 34.900,01 euros. A Xunta aportou a esta adquisición do Concello de Portas un total de 29.856,75 euros, o 75% do orzamento inicialmente previsto.
Dalonga, ofertou unha Citroen Berlingo eléctrica que cumpre perfectamente coas especificacións técnicas recollidas no pliego de contratación pública. Ademais, este vehículo foi equipado cunha baca e tamén cun gancho de remolque traseiro co fin de darlle maior operatividade.
Ricardo Martínez salientou a importancia de ir renovando a flota de vehículos e adaptándoos ás novas esixencias. Así, esta furgoneta é o primeiro automóbil eléctrico que se incorpora ao Concello de Portas e ten emisión cero polo que tamén contribúe a cumprir cos compromisos adquiridos no Pacto de Alcaldías polo Clima e a Enerxía Sostible (PACES) que prevé unha redución do 30% das emisións contaminantes.
Ademais, hai uns días, o Concello de Portas convertiuse en pioneiro no fomento do uso de enerxías alternativas ao emprego de combustibles fósiles tras instalar na Rapeira un posto de recarga semirápida para automóviles, bicicletas eléctricas e patinetes. Polo momento, este servizo terá un carácter gratuíto e autoxestionado polos usuarios co que o Concello pretende ofrecer unha alternativa medioambiental sostible.
O custe total do investimento foi de 10.836,23 euros e contou cunha achega de 9.687,59 euros provinte do Fondo Europeo Agrícola de Desenvolvemento Rural (Leader) que permite contar con estas instalacións habilitadas a través de dúas prazas de aparcamento sinalizadas en verde no chan e que poderán dar servizo a dous automóbiles ao mesmo tempo cunha potencia máxima de 22 Kw/hora.