– A concellería de Urbanismo enviou a mediados deste mes un informe técnico á Consellería de Educación advertindo da situación de risco que presenta o tellado do centro. O documento sinala que se debe proceder á “inmediata execución” das obras para manter as condicións de seguridade, como a colocación dun valado de protección e a posterior reforma integral da cuberta.
– A alcaldesa, Digna Rivas, advirte que a situación do CEIP Laredo supón “un grave problema de seguridade” tanto para o alumnado do centro como para o profesorado, familias e viandantes. A rexedora lamenta que o Concello aínda non obtivo resposta por parte da Xunta de Galicia “que é a administración que ten a competencia en materia de Ensino”.
A cuberta do CEIP Laredo, na parroquia de Chapela, presenta un grave estado de deterioro con risco de desprendemento de tellas. A concellería de Urbanismo do Concello de Redondela enviou a mediados deste mes un informe técnico á Consellería de Educación da Xunta de Galicia advertindo da situación de risco que presenta o tellado do centro. O informe sinala varias “medidas de seguridade urxentes”, como a colocación dun valado perimetral para “garantir que ninguén poida acceder ao perímetro de seguridade”. Tamén é necesario colocar unha rede de seguridade “para evitar que se desprenda calquera elemento da cuberta”.
Por outra banda o informe técnico do departamento de Urbanismo determina a necesidade de elaborar un proxecto que recolla as obras necesarias “para garantir a reforma integral da cuberta do colexio”.
A alcaldesa de Redondela, Digna Rivas, advirte que a situación do CEIP Laredo supón “un grave problema de seguridade” tanto para os máis de 180 alumnos e alumnas do centro como para o profesorado, familias e viandantes que pasan pola beirarrúa do colexio. A rexedora lamenta que o Concello aínda non obtivo resposta por parte da Xunta de Galicia “que é a administración que ten a competencia en materia de Ensino”. Rivas avanza que en xaneiro o Concello convocará a unha xuntanza aos representantes da ANPA e profesorado do CEIP Laredo para darlles conta da situación actual do centro e acordar coa comunidade educativa as posibles medidas a adoptar.
