A primeira fase do servizo ten por obxectivo facilitar o desprazamento das persoas beneficiarias -persoas usuarias de servizos sociais, persoas en risco de exclusión social, persoas maiores e todas aquelas persoas con necesidades de transporte específicas- ás dependencias municipais e ao centro de saúde de Arcade.
O Concello de Soutomaior vén de anunciar que a partir do vindeiro luns, 25 de setembro, vai habilitar a primeira fase dun servizo de ‘transporte a demanda’ entre as parroquias do concello. Nesta primeira fase, os colectivos beneficiarios serán as persoas usuarias de servizos sociais, persoas en risco de exclusión social, persoas maiores e todas aquelas persoas con necesidades de transporte específicas.
O servizo, que vai a cargo do orzamento municipal e será gratuíto para as persoas usuarias, ten por obxectivo facilitar o transporte ás persoas dos colectivos antes mencionados que teñan citas nas dependencias municipais -con especial énfase nos servizos habilitados no Centro de Benestar Integrado de Soutomaior- ou no centro de saúde de Arcade, así como para cubrir outras necesidades sociosanitarias das persoas usuarias.
Esta primeira fase do transporte a demanda será tramitada directamente polos Servizos Sociais do Concello de Soutomaior, que se encargarán de xestionar todo o procedemento. Tras esta primeira fase, a intención do Concello de Soutomaior é poder ampliar o servizo a máis colectivos e veciñanza.
O Concello de Soutomaior leva semanas a traballar co obxectivo de que as persoas beneficiarias desta primeira fase do servizo de transporte a demanda puidesen beneficiarse do servizo canto antes. Neste sentido, o alcalde de Soutomaior, Manu Lourenzo, mantivo unha reunión a pasada semana co sector de taxistas do concello para avanzar na implantación deste servizo, que finalmente xa é unha realidade.
O alcalde Manu Lourenzo sinalou que “habilitamos a primeira fase do servizo de transporte a demanda co obxectivo claro de facilitar o desprazamento das persoas beneficiarias e que poidan achegarse ás dependencias municipais como o Centro de Benestar Integrado, e os centros sociosanitarios do concello. Posteriormente o servizo de transporte a demanda se ampliará a outros colectivos para que máis veciñanza poida beneficiarse desta medida”.
