A Oficina de Turismo recibe no mes de xullo a máis de 4.500 visitantes.
A Oficina de Turismo do Grove atendeu neste mes de xullo 1.628 consultas presenciais, o que supón un total de 4.557 visitantes recibidos. Estes datos superan as cifras acadadas no mes de xullo do ano pasado, pero tamén son superiores aos rexistrados nos meses de xullo de 2018 e 2019, cando se contabilizaron 4.054 e 4.174 visitas respectivamente. Este aumento no número de visitantes resulta considerable dado a que tivo lugar a pesar das limitacións actuais, as cales restrinxen a atención presencial na oficina a unha consulta de cada vez e non podendo atender a máis dunha familia dentro da oficina ao mesmo tempo, debido ao tamaño das instalacións.
En canto á procedencia, por comunidades a de Madrid resulta ser o principal mercado emisor, seguida de Castela e León, País Vasco e Andalucía. Sen embargo, se se toman como referencia as provincias, Madrid estaría seguida de Biscaia, Barcelona e Navarra.
Por outra banda, cabe subliñar o grande número de turistas que se aloxan en apartamento, chegando as cifras case a igualar a aqueles que se aloxan en hotel.