Permitirá unha maior seguridade vial na zona ademais de habilitar ámbolos dous lados da estrada para estacionamento de vehículos
O Concello da Lama establece de sentido único e descendente a Rúa Igrexa ao seu paso pola Alameda para mellora-la seguridade vial e favorece-lo acceso de viandantes aos servizos dotacionais existentes nas inmediacións.
Esta medida entrará en vigor a partir de mañá xoves 27 de maio e facilitará tamén que a Rúa Igrexa dispoña de aparcamentos habilitados en ámbolas dúas beiras da estrada favorecendo tamén o estacionamento e ampliando a vía de acceso ao centro da vila.
Así, a partir de mañá o tráfico procedente de Sucastro ou da Praza da Pedreira so poderá baixar por onde está o Bar Terraza cara á Casa Consistorial e o procedente da igrexa e do tanatorio terá que dirixirse, obrigatoriamente, por diante do Consistorio para seguir cara outras direccións da vila.
O alcalde Jorge Canda tomou esta decisión ante o aumento de vehículos na zona así como de viandantes que convertían este vial nun acceso con problemas de seguridade polo que a partir de agora este tramo da rúa Igrexa será de sentido único descendente.