O alcalde Samuel Lago e a concelleira Fátima Abal planificaron o inicio do novo curso coas direccións dos centros educativos.
O alcalde de Cambados, Samuel Lago, e a Concelleira de Educación, Fátima Abal, reuníronse este xoves coas direccións dos colexios de infantil e primaria do municipio para planificar diferentes cuestións cara este curso escolar 2022-23.
En concreto, ambas partes abordaron a xestión dos servizos que contan coa colaboración ou financiación municipal: o Plan Madruga, os comedores escolares e a limpeza.
Así, o Concello seguirá mantendo o Plan Madruga a un prezo de 40 euros ao ano por alumno. “Consideramos que de trata dun programa clave para conciliar a vida laboral e familiar e de feito este ano superamos por primeira vez as 200 familias usuarias, o que mostra a importancia deste servizo xa implantado en todos os centros”, indica o alcalde.
Asimesmo, o goberno local continuará colaborando cos comedores escolares, dispoñibles tamén en todos os colexios de Cambados, coa prestación dun monitor que reforzará a atención en cada un deles.
No que respecta á limpeza dos centros, o Concello reforzará a asistencia, que, se ben será inferior ao que se viña realizando durante a pandemia, será superior aos anos anteriores ao covid.
Ademáis de todas estas cuestións, os e as responsables dos centros educativos trasladaron ao alcalde e á concelleira as necesidades de melloras nas súas instalacións, para as que o Concello irá buscando o financiamento necesario.
Tamén se abordou o estado de execución das diferentes obras que o goberno local está realizando en cada centro.