O alcalde, José Cela, explica que se encargou un proxecto para renovar e ampliar as
beirarrúas, crear pasos de peóns elevados e instalar un redutor da velocidade. Solicitouse
unha subvención á Deputación de Pontevedra para cofinanciar a actuación, que ascende a
máis de 207.000 euros.
A Rúa Doutor Batallán cambiará a súa estética e a súa mobilidade. O alcalde, José Cela,
anunciou esta mañá que o Concello encargou a elaboración dun proxecto para humanizar
esta céntrica rúa, mellorando sobre todo as súas beirarrúas e gañando novos espazos para
o tránsito peonil.
A actuación prantéxase para os dous marxes da rúa, desde o cruce co edificio do Concello
ata chegar ao final do chan urbano, en dirección ao núcleo rural de O Covelo. O que
prantexa o proxecto é renovar ambas beirarrúas e amplialas lixeiramente, ademais de crear
unha plataforma única no tramo próximo ao cruce coa Rúa 1.
Ademais, colocaranse pasos de peóns elevados no pavimento para dar continuidade a ese
ancheamento das beirarrúas e colocarase un badén redutor de velocidade para calmar o
tráfico que une Moraña con Caldas.
“O que pretendemos con este proxecto é mellorar a mobilidade urbana do noso centro. Xa
temos varias obras pendentes que suporán un cambio sustancial aquí en Santa Lucía, como
a humanización da Rúa 7 ou a remodelación da Rúa 6, xunto ao Multiusos”, explicou o
alcalde. “O que facemos agora é continuar con esta batería de proxectos urbanísticos
importantes para Moraña, dotando a Doutor Batallán de mellor mobilidade e accesibilidade,
eliminando barreiras arquitectónicas”, explica.
Cela explica que se lle solicitou unha subvención á Deputación de Pontevedra, a través do
Plan Concellos, para poder facer fronte á inversión prevista para esta actuación, que
ascende a 207.014 euros (IVE incluído) para a súa licitación. O Concello complementará esa
inversión cunha partida propia cercana aos 40.000 euros.