‣ Os veciños e veciñas veñen de denunciar á APLU no Contencioso por non ter aplicado as retiradas sentenzas que obrigan a demoler a obra ilegal.
O concelleiro responsable da parroquia de Marcón, Alberto Oubiña reunirase esta semana cos veciños e veciñas de Marcón en sinal de apoio á súa loita contra un desguace ilegal situado no lugar de Vilafranca. Os veciños veñen de informar ao Concello que denunciaron á APLU (Axencia de Protección da Legalidade Urbanística da Xunta de Galicia) no Xulgado Contencioso de Pontevedra que a día de hoxe non executou a demolición do nomeado lugar, a pesar de ter sentenzas que obrigan á demolición.
Este desguace de Marcón é un asunto dilatado no tempo, que ten os seus inicios no ano 2004. A obra foi paralizada hai dezasete anos, sendo no 2006 a propia Xunta a que declarou ilegal a obra e instara aos promotores a restituír os terreos.
O lugar segue a estar na mesma situación logo de varios anos e reiteradas chamadas de atención por parte do Concello de Pontevedra, lembrándolle a Xunta de Galicia que é preciso aplicar ou executar as sentenzas correspondentes e devolver os terreos ao estado anterior, tal e como xa fora solicitado en setembro do ano pasado. Este mesmo ano, 2021, o Concello volveu instar á Xunta a que derrubase e mantivese o control deste asunto e que tomase as decisións pertinentes para derrubar as obras feitas ilegalmente hai xa máis dunha década.
