O Concello de Pontevedra volve convocar a Mesa xeral de negociación para o vindeiro venres, 13 de maio, para tratar asuntos como o proceso de estabilización do persoal laboral ou outros asuntos tanto pendentes como solicitados polos sindicatos.
Dado o volume de temas que se pretende abordar, a Concellaría de Persoal acordou celebrar no mesmo día dúas reunións da Mesa. A primeira será ás 09.30 horas cun único punto da orde do día: estabilización do persoal laboral temporal, a fin de iniciar os trámites administrativos nesa mesma mañá e cumprir coa condición que establece a Lei 20/2021, de ter publicada a oferta de emprego antes do 1 de xuño.
A segunda Mesa celebrarase ás 12.30 horas onde se tratarán tanto asuntos pendentes como outros demandados pola parte sindical inluíndo, ademais, un calendario de negociacións para que todos os temas sexan tratados no debido tempo.