O director do colexio, Rafael Sánchez-Agustino, amosoulle as instalacións do centro, a biblioteca, o estudio de radio e de animación e comentoulle os pormenores da elaboración do panel interactivo sobre os Músicos do Pórtico da Gloria
O colexio da Lama recibiu esta mañá a visita do director xeral de Centros e Recursos Humanos da Xunta de Galicia, Jesús Álvarez Bértolo, quen veu en representación do conselleiro de Educación, Román Rodríguez, para coñecer de primeira man o PDI elaborado polo alumnado durante este curso escolar adicado ao Camiño de Santiago e que consistiu na construción dun panel xigante interactivo cos músicos do Pórtico da Gloria.
O director do centro, Rafael Sánchez-Agustino, acompañado dos alumnos e alumnas de 6º de primaria, presentou este proxecto dedicado ao Camiño de Santiago e ao Ano Xacobeo 21-22. Trátase dun mural interactivo de 7 metros de ancho e 2 de alto coas figuras representativas do Pórtico da Gloria acompañadas duns botóns que permiten escoita-lo son que emitían os instrumentos medievais da época e a voz dos propios nenos e nenas relatando informacións breves relacionadas coa Catedral de Santiago e a súa historia.
Logo de coñecer de preto o resultado do PDI, os nenos e nenas mostraron a Jesús Álvarez as instalacións do centro escolar a través dun pequeno percorrido pola súa biblioteca, o seu estudio de radio e tamén o novo de animación, onde o director Sanchez-Agustino explicou que tamén estaban traballando en pezas audiovisuais sobre o Camiño de Santiago.
Esta visita ao centro escolar lamense contou tamén coa presenza do tenente de alcalde do Concello da Lama, David Carrera, e o concelleiro de Cultura e Deportes, Daniel Vidal, que mostraron interese polo funcionamento deste mural interactivo e acompañaron ao director xeral polas distintas dependencias do centro educativo. Ademais, Carrera e Vidal, trasladáronlle unha mensaxe de agradecemento polo seu traballo aos nenos e nenas de 6º de primaria, que acaban de finalizar o seu derradeiro curso na Lama, e eloxiaron a súa traxectoria e dedicación ao longo da súa etapa formativa.
Ao remate, Jesús Álvarez tomou nota das peticións do alumnado co centro, que se centraban principalmente en dotar de materiais lúdicos e deportivos o patio de recreo. Ademais, Álvarez felicitou persoalmente ao director do centro de ensino, Rafael Sánchez-Agustino, ao mestrado e ao alumnado polo traballo realizado. Mostrouse ademais moi satisfeito polo uso que se lle está dando a todo o material do centro de ensino, enfocado a estimular a creatividade dos cativos e a instruirse nas novas tecnoloxías, fundamentais no só no desenrolo das seguintes etapas escolares, senón tamén nas vindeiras profesións de futuro.