A certificación Passive House garantirá un consumo case nulo, un maior confort e menor impacto ambiental
O edificio está actualmente en proceso de certificación oficial e xa superou con éxito todas as probas técnicas
Tomiño aspira a situarse na vangarda da eficiencia enerxética en Galicia co edificio Isaura Gómez. Esta infraestrutura estratéxica para o municipio foi deseñada e construída seguindo os criterios do estándar internacional Passivhaus, un recoñecido modelo de construción de alta eficiencia enerxética que busca minimizar o consumo enerxético, dando prioridade á comodidade térmica e acústica dos espazos interiores e reducindo de xeito significativo as emisións contaminantes.
Para iso, o edificio conta con illamento térmico reforzado, ventilación mecánica con recuperación de calor e sistemas de control domótico. Ademais do deseño pasivo, utilizarase enerxía xeotérmica como fonte renovable para calefacción e refrixeración, reforzando o así o compromiso coa sostibilidade que suporá un aforro enerxético moi importante a medio e longo prazo.
Durante a execución da obra realizáronse controis rigorosos sobre os materiais e sistemas construtivos empregados. Entre outros, leváronse a cabo dúas probas tipo BlowerDoor para medir a estanqueidade do edificio e asegurar que non haxa perdas de calor innecesarias, cun resultado final de 0,38 renovacións por hora, moi por debaixo do máximo permitido (0,60), superando así un dos principais requisitos técnicos do estándar.
“Aspiramos a conseguir a cualificación Passive House, un dos maiores estándares de eficiencia enerxética da Unión Europea. Este proxecto é unha aposta firme pola innovación, a sostibilidade e a calidade de vida das persoas”, sinalou a alcaldesa, Sandra González.
Na actualidade, está en curso o proceso de certificación oficial ante o Instituto Passivhaus de Alemaña, coa dirección técnica de Martín Amado Pousa, profesional acreditado con ampla experiencia neste eido. Con este proxecto, o Concello consolida o seu compromiso cun modelo de desenvolvemento urbano sostible e centrado nas persoas, apostando por unha arquitectura que combina innovación, eficiencia e respecto polo medio ambiente.
