O público respaldou o XI Festival Internacional Algazara “Danzando entre culturas” enchedo a Feira Vella de aplausos. Coa súa presenza recoñeceron o valor cultural e social das danzas tradicionais e do folclore popular.
Os catro grupos participantes contribuíron no escenario da Feira Vella a manter viva a memoria colectiva dos pobos e ao fortalecemento do sentido de pertenza.
A “Compañía Artística Mien-Moh” de Costa de Marfil, o conxunto de canto e danza “Shurq Salodari” de Uzbekistán, o WICI Song & Dance Theatre de EEUU e e Triskari Dantza Taldea de Euskalherría e a Agrupación Folclórica Algazara, organizadora do evento, actuaron para un numeroso público. Un espectáculo que este ano homenaxeaba ás cantareiras, en concreto a Palmira e a Saladina, que recibiron da man da alcaldesa Nava Castro e do tenente de alcaldesa, Juan Carlos González, un agasallo.
Tamén houbo un intercambio de agasallos entre o Concello e os grupos participantes, algúns deles en forma de pano típico de Uzbekistán, ou de cantiga popular galega cantada polo grupo vasco Triskari Dantza Taldea. Así, unidos pola música, polas voces e polas danzas os cinco grupos deleitaron ao público.
Alcaldesa e tenente de alcaldesa felicitaron á Agrupación Folclórica Algazara polo traballo destes once anos que permitíu coñecer unha parte da cultura dos máis de trinta países que actuaron na Feira Vella ao longo deste tempo.
