o O alcalde destaca que a veciñanza está a ter un “retorno moi positivo” con esta mellora que permitirá “reducir un 70% o consumo” e aumentar a cantidade de luz
o O proxecto, no que se leva investido máis dun millón de euros, estará rematado a finais deste ano
O goberno local vén de rematar os traballos de renovación do alumeado público nunha ducia de parroquias estradenses grazas á instalación de 3.000 luminarias LED cun investimento superior ao millón de euros. No que vai de ano xa se executaron prácticamente a totalidade das obras en Ouzande, A Somoza, Tabeirós, Nigoi, Souto, Arca, Codeseda, Sabucedo, Liripio, Ribela, Parada e Guimarei.
Na actualidade estase a traballar no alumeado de Lagartóns e Callobre e, ao mesmo tempo, están a levar a cabo o cambio de postes de madeira por outros novos de formigón. Ata agora xa se mudaron 400 apoios dos puntos de luz, e esta actuación continúa en Vinseiro e Cereixo.
O alcalde, José López, sinalou que a veciñanza do rural está a ter un “retorno moi positivo” con estos traballos e destacou o “esforzo tan importante que supón este proxecto”, no que o Concello está a investir 6,5 millóns de euros para aumentar a capacidade lumínica en 12.500 puntos de luz e mellorar a súa eficiencia reducindo o seu consumo. López precisou que a finalización destas actuacións, prevista para finais de ano, conlevará un “impacto económico sen precedentes ao poder reducir ata un 70% o consumo eléctrico da Estrada”.
Grazas a este aforro, o rexedor local avanzou que se van restablecer puntos de luz que foran eliminados no seu día pola crise económica e tamén se valorará a colocación de novas luminarias en zonas do rural pouco iluminadas atendendo ás peticións da veciñanza.
Durante o mes de xuño, os traballos de instalación de luminarias LED continuarán nas parroquias de San Pedro de Ancorados, Remesar, Agar, San Tomé de Ancorados, Rubín, Lamas, Curantes, Olives e Pardemarín.
