O actual goberno municipal de As Neves, liderado polo alcalde Jose Manuel Alfonso, lamenta profundamente a campaña de desinformación que intenta promover o BNG respecto da situación do Servizo de Axuda no Fogar (SAF) no noso concello. Esta situación é o resultado dun contrato licitado durante o mandato do anterior goberno do BNG, un contrato claramente desaxustado e precario que deixou ás traballadoras do SAF nunha posición vulnerable durante os últimos anos.
Dito contrato, asinado polo BNG, non contemplaba as subas necesarias do IPC nin a revisión anual dos salarios, o que provocou que as traballadoras foran perdendo poder adquisitivo ano tras ano. Agora, o BNG pretende posicionarse como o salvador dunha situación que eles mesmos xeraron, cando son plenamente conscientes de que a raíz do problema é a mala xestión do seu propio goberno.
O actual equipo do PP, comprometido coa mellora das condicións laborais das traballadoras do SAF, xa enviou as bases para que se licite un novo contrato con prezos axustados á realidade e con revisións anuais de incrementos salariais e fiscais. O obxectivo do novo contrato é garantir que esta situación non se repita, asegurando unhas condicións laborais dignas e sostibles para as traballadoras que prestan un servizo tan esencial á nosa comunidade.
É sorprendente que o BNG agora trate de impugnar este novo contrato, unha acción que parece ter como única finalidade xerar malestar entre o persoal do SAF e atrasar aínda máis o proceso de licitación. O alcalde Jose Manuel Alfonso pregúntase se esta é unha estratexia do BNG para prolongar a precariedade laboral que eles mesmos causaron, utilizando ás traballadoras do SAF para os seus propios fins políticos.
Dende o goberno municipal seguimos traballando con profesionais para asegurar que o novo contrato se axuste á normativa vixente e mellore as condicións laborais das traballadoras. Pedimos á oposición que adopte unha actitude construtiva e deixe de poñer atrancos que só prexudican ás traballadoras e aos usuarios do servizo.
O alcalde Jose Manuel Alfonso fai un chamado á responsabilidade política e solicita ao BNG que explique claramente ás traballadoras do SAF quen é o verdadeiro responsable da precariedade laboral que estiveron sufrindo.
