- A subida do canon que os Concellos pagan a Sogama pola xestión do lixo supón un incremento no prezo do 60%. Esta decisión da empresa pública, que depende da Xunta de Galicia, obriga ao Concello a actualizar a taxa de residuos para compensar o custo do servizo, que se incrementará en case 300.000 euros ao ano.
- A alcaldesa lembra ademais que a actual taxa “xa era deficitaria antes deste incremento, porque se mantén conxelada desde 2001”. O Concello de Redondela leva 23 anos sen subir o recibo do lixo, polo que os domicilios urbanos pagan 5,9 euros ao mes polo servizo, e no rural onde a recollida no é diaria pagan 2,9 euros ao mes.
- A partir de 2025 todos os Concellos de España estarán obrigados por lei a incrementar a taxa do lixo, unha medida que busca penalizar aos cidadáns que xeren máis residuos. Esta obriga xorde dunha directiva europea para promover unha reciclaxe máis eficiente e reducir o impacto ambiental dos residuos sólidos urbanos.
O Concello de Redondela terá que asumir un considerable aumento nos custos do tratamento do lixo debido á decisión da Xunta de Galicia de incrementar o canon de Sogama. A empresa pública que xestiona os residuos pasou dun canon de 66 euros por tonelada a 88 euros en 2024, e o prezo aumentará ata os 108 euros en 2025. Isto vai supoñer un incremento no gasto de 295.624 euros ao ano, segundo os cálculos dos servizos técnicos do Concello. A alcaldesa de Redondela, Digna Rivas, expresou o seu descontento ante esta decisión, sinalando que “a subida é inxusta debido ao seu carácter retroactivo e unilateral”, ao tempo que lamenta que os municipios estean obrigados a afrontar os custos dun modelo de xestión de residuos que elixiu a Xunta “e que é claramente antiecolóxico”. Este incremento aplicado pola Xunta “evidencia a falta de sustentabilidade do sistema actual, que non cumpre as directivas ambientais europeas”.
Co obxectivo de cubrir estes novos gastos, o Concello de Redondela levará a pleno o 24 de outubro unha proposta de modificación da ordenanza da taxa de residuos. Esta medida está deseñada para cubrir parte dos case 300.000 euros do incremento establecido pola Xunta. A alcaldesa lembra ademais que a actual taxa “xa era deficitaria antes deste incremento, debido a que se mantén conxelada desde 2001”. O Concello de Redondela leva 23 anos sen subir o recibo do lixo, polo que os domicilios urbanos pagan 5,9 euros ao mes polo servizo, e no rural onde a recollida no é diaria pagan 2,9 euros ao mes.
A alcaldesa advirte ademais que actualizar a taxa da recollida do lixo é “unha obriga legal”. A partir de 2025 todos os Concellos de España estarán obrigados por lei a incrementar a taxa do lixo, unha medida que busca penalizar aos cidadáns que xeren máis residuos. Esta obriga xorde dunha directiva europea que esixe aos Estados membros que promovan unha reciclaxe máis eficiente e reduzan o impacto ambiental dos residuos sólidos urbanos.
