Dous informes técnicos realizados sobre a situación das árbores da Alameda Castelao determinan a necesidade da tala de tres destes exemplares. Trátase de dous cipreses e un abeto de gran porte que presentan grave risco de caída. Tanto o informe realizado pola Estación Fitopatolóxica Areeiro, da Deputación de Pontevedra, como o estudo biomecánico e fisiolóxico realizado por unha empresa especializada, establecen que nestas tres árbores existen “danos severos”. Os informes técnicos establecen que “desde o punto de vista da seguridade das persoas, debido aos graves defectos detectados nestes tres exemplares, recoméndase a tala como medida correctora do risco”.
A alcaldesa de Redondela, Digna Rivas, sinala que “o primeiro é a seguridade das persoas” polo que, á vista dos informes realizados polos técnicos, unha empresa especializada procederá á tala destas tres árbores. Desde o Concello avanzan tamén que estes tres exemplares serán substituídos por outras árbores que se adapten ao entorno, “seguindo sempre os criterios técnicos e as recomendacións dos especialistas”.
O mal estado de tres árbores da alameda obriga á súa tala ante o risco de caída
