• A situación vivida este luns, con tan só tres bombeiros de garda en plena onda de calor e xusto despois do incendio rexistrado na rúa Riestra, foi cualificada como “inadmisible” polo PP
• “É unha cuestión de seguridade para os propios bombeiros e para toda a cidadanía de Pontevedra. Xa está ben. Vai sendo hora de que o BNG se ocupe dos problemas reais desta cidade”, afirmou Pardo
O grupo municipal do Partido Popular de Pontevedra volveu a denunciar publicamente a grave situación que atravesa o servizo de bombeiros do Concello. Segundo declarou o seu portavoz, Pepa Pardo, “é unha auténtica vergoña o que está a suceder”, en referencia á alarmante falta de persoal que afecta o corpo.
A situación vivida este luns, con tan só tres bombeiros de garda en plena onda de calor e xusto despois do incendio rexistrado na rúa Riestra, foi cualificada como “inadmisible” polo PP. Esta circunstancia, aseguran, “deixa ao descuberto a incapacidade e a falta de xestión do goberno municipal e, en concreto, da concelleira Eva Villaverde, responsable da área”.
Desde o Partido Popular esixen ao Concello que dea prioridade a reforzar de forma urxente o servizo de bombeiros. “É unha cuestión de seguridade para os propios bombeiros e para toda a cidadanía de Pontevedra. Xa está ben. Vai sendo hora de que o BNG se ocupe dos problemas reais desta cidade”, afirmou Pardo.
O PP quixo trasladar tamén o seu apoio total aos bombeiros de Pontevedra. “Realizan un labor exemplar e merecen todo o noso respaldo. Queremos que saiban que estamos con eles e que reclamamos unha solución inmediata. Se a concelleira non é capaz de xestionar o persoal, o que debe facer é apartarse e deixar paso a quen si poida facelo”, conclúen.
