● A vila suma xa 2.364 nenos e nenas menores de 12 anos e no ano 2005 eran 2.085, o que supón un incremento na población infantil de case 300 pequenos e pequenas
No corazón da Louriña, o Concello do Porriño continúa a tecer unha historia de crecemento e vitalidade, amosando que a vida no municipio segue medrando con forza. Nos primeiros seis meses deste ano, o municipio rexistrou un total de 55 nacementos, un sinal claro dunha comunidade que non perde o seu pulso e que segue a ser un espazo atractivo para formar familias.
A distribución dos nacementos mantén unha harmonía case perfecta entre varóns e mulleres, con 25 cativos s e 30 cativas que xa dan vida á vila. Estes números reflicten unha evolución demográfica positiva, tanto en número de nacementos como en crecemento poboacional.
Esta recuperación é especialmente significativa no contexto galego, onde as cifras de natalidade sufriron en anos recentes un descenso constante. O Porriño, con máis de 140 nacementos no ano pasado, superou as cifras de 2023 no que segundo o IGE (Instituto Galego de Estatística) rexistráronse 139, confirmando un proceso de lixeira pero constante recuperación que anima ás súas rúas.
Poboación infantil en crecemento
No ámbito da poboación infantil, a vila suma xa 2.364 nenos e nenas menores de 12 anos e, a modo de referencia histórica, cómpre lembrar que no ano 2005 eran 2.085, o que supón un incremento na población infantil de case 300 pequenos e pequenas. Ademais, obsérvanse crecementos notables en franxas de idade que reflicten o dinamismo social con respecto ao ano pasado: os pequenos, de 2 a 3 anos, aumentaron en catro nenas e nenos respecto ao ano anterior, mentres que o grupo de 10 a 11 anos tamén medrou substancialmente, pasando de 413 a 426 pequenos porriñeses. A distribución por xénero nos nacementos mantense estable, cun 51,99 % de varóns fronte a un 48,01 % de mulleres, o que amosa unha paridade case perfecta entre bebés nados.
Evolución demográfica
En canto á evolución da poboación total, o municipio porriñés experimentou un crecemento notable nas últimas dúas décadas. No ano 2005, o Porriño contaba con 16.997 habitantes, mentres que en 2024 a cifra acadou as 20.995 persoas, segundo os datos do Padrón Municipal. Actualmente, a distribución por xénero da poboación sitúase nun 51 % de mulleres e un 49 % de homes, é decir, hai máis porriñesas que porriñeses.
Alejandro Lorenzo, alcalde do Porriño, sinala:
“Estes números son moito máis que estatísticas; son o reflexo da confianza que as familias depositan na nosa vila, na calidade de vida que ofrecemos e na esperanza dun futuro mellor. O Porriño segue a ser un lugar onde crecer, soñar e construir unha vida, e como administración pública estamos comprometidos en crear as condicións necesarias para que esta tendencia positiva non só se manteña, senón que se intensifique nos próximos anos.”
Nun contexto social e demográfico marcado por desafíos, o Porriño eríxese como un exemplo local de esperanza, onde a vida renace e medra con paso firme. Desde o Concello do Porriño valoramos estes datos como un reflexo da dinámica vital do municipio, que segue a medrar e consolidarse como un espazo atractivo para vivir e formar familia.
Un Porriño para a infancia: actividades e servizos para crecer felices
Ante o incremento da natalidade no noso concello, o Goberno local reafirma a súa aposta decidida polo benestar das familias e por unha educación de calidade dende as primeiras etapas da vida. Esta realidade demográfica impulsou a posta en marcha de diversas iniciativas que consolidan ao municipio como un referente en políticas educativas, sociais e de conciliación.
A aposta polas escolas infantís traduciuse na creación de dúas novas instalacións, co obxectivo de garantir espazos seguros, accesibles e adaptados ao desenvolvemento dos máis pequenos. En paralelo, estase a realizar unha mellora continua dos colexios, modernizando infraestruturas e recursos pedagóxicos para ofrecer unha contorna educativa moderna e de calidade.
O Concello tamén puxo en marcha un sistema de bolsas de estudo que recoñece o esforzo do alumnado e favorece a igualdade de oportunidades. Xunto a isto, funciona un servizo de atención temperá fundamental para a detección e intervención precoz ante dificultades no desenvolvemento infantil.
Co fin de facilitar a conciliación laboral e familiar, implantáronse as aulas madruga e o servizo de comedor escolar, que ademais garanten unha alimentación equilibrada e supervisada para o alumnado.
A oferta educativa complétase cun amplo abano de actividades infantís ao longo do ano, entre as que destacan os campamentos urbanos, excursións á neve ou actividades como o surf, pensadas para fomentar o lecer activo, a aprendizaxe e a socialización.
Ademais, o Concello concede subvencións directas ás ANPAS como apoio á súa importante labor na dinamización escolar e participación da comunidade educativa. Tamén está en marcha un plan de renovación progresiva dos parques infantís, que se están transformando en espazos máis seguros, inclusivos e atractivos, pensados para o disfrute e benestar das familias porriñesas.
O Porriño aposta así por unha vila que medra con ledicia, coidando aos seus nenos e nenas e apoiando ás familias nun proxecto común de futuro.
