• Juncal esixe un plan de usos para que poida albergar outras disciplinas deportivas: “Hai moitos clubs que levan anos adestrando nunhas condicións precarias e que tamén necesitan unhas instalacións dignas”
• Os populares demandan ao goberno local garantir que o novo recinto deportivo responda á demanda real dos deportistas pontevedreses
O grupo municipal do Partido Popular ha esixido ao Concello de Pontevedra un plan de usos para o futuro pavillón de tenis de mesa no barrio de Monte Porreiro, cuxo proxecto supoñerá un investimento total de 6,4 millóns de euros.
O PP de Pontevedra considera positiva a licitación de novas instalacións deportivas municipais, tan necesarias na cidade, pero advirte da importancia de poder compatibilizar o tenis de mesa con outras disciplinas deportivas para sacar o maior rendemento posible á instalación.
O concelleiro popular Guillermo Juncal manifestou que é “imprescindible” que exista un plan de usos para que “o novo pavillón poida albergar o uso prioritario que lle quere dar o alcalde ao tenis de mesa con outras disciplinas deportivas que tamén merecen unhas instalacións dignas e que levan moitos anos adestrando nunhas condicións precarias”.
Os representantes veciñais do barrio decatáronse do proxecto pola prensa, o que volve poñer de manifesto que o alcalde #Miguel Anxo Fernández Lores e os seus oito concelleiros seguen actuando de costas aos cidadáns de Monte Porreiro.
“Desde o PP non queremos que a cidade perda a oportunidade de ter un pavillón de primerísimo nivel, que se limite unicamente a unha disciplina deportiva. Pontevedra ten moitas carencias no deporte de base e existen moitos clubs esperando por unhas instalacións dignas”, concluíu Juncal tras insistir en que é necesario garantir que o novo recinto deportivo responda á demanda real dos deportistas pontevedreses.
